Չինացի հաքերները կոտրել են Եվրոպայում պետական կառույցների օգտահաշիվները

Չինացի հաքերները մուտք են գործել շուրջ 25 կազմակերպությունների, այդ թվում՝ պետական ​​կառույցների էլեկտրոնային փոստի հաշիվներ, ինչպես նաև անձանց համապատասխան օգտահաշիվներ, որոնք, ենթադրաբար, կապված են այդ կազմակերպությունների հետ: Այս մասին հայտնել է Microsoft-ը, փոխանցում է DW-ի ռուսական ծառայությունը։

Նշվում է, որ խոսքը Storm-0558 անվանումով հայտնի հաքերային խմբի մասին է։ Հարձակումներն ուղղված են եղել, մասնավորապես, արևմտյան Եվրոպայի դեմ, գրում է AP  գործակալությունը։

Microsoft-ը, սակայն, հարձակման թիրախում հայտնված տարածաշրջաններ չի նշում։

Ըստ կորպորացիայի՝ Storm-0558 խումբը «կենտրոնացած է լրտեսության վրա, օրինակ՝ տեղեկատվություն հավաքելու համար էլեկտրոնային փոստի համակարգերին հասանելիության ձեռքբերում»:

Microsoft-ը հունիսի 16-ին սկսել է հետաքննել Storm-0558-ի հերթական հարձակումը՝ հիմնվելով ընկերության հաճախորդի կողմից էլեկտրոնային փոստի արտասովոր գործունեության մասին զեկույցի վրա: Պարզվել է, որ անօրինական գործողությունները շարունակվել են առնվազն մեկ ամիս։ Այս պահին, ըստ Microsoft-ի, հաճախորդների համար հարձակման բոլոր հետևանքները վերացված են։

Ամերիկյան Washington Post-ի տվյալնրով՝ հաքերներն օգտվել են Microsoft Cloud ծառայության խոցելիությունից։ Երբ խնդիրը հայտնաբերվել է պետական մարմինների կողմից, պաշտոնյաներն անմիջապես կապվել են ընկերության հետ՝ պարզելու կիբերհարձակման աղբյուրն ու ամպային ծառայության խոցելիությունը, հայտնել է Ազգային անվտանգության խորհրդի ներկայացուցիչ Ադամ Հոջեսը։

Նշվում է, որ ՀԴԲ-ն հետաքննություն է սկսել։ Լրատվամիջոցի աղբյուրների տվյալներով՝ ԱՄՆ ՊՆ-ի, Սպիտակ տան և հետախուզության օգտահաշիվները կիբերհարձակումից չեն տուժել։

Էմմա Չոբանյան