08.10.2026 | 14:15
Տոկաևն առաջարկել է Միջին միջանցքն ինտեգրել TRIPP-ին
Կրեմլը Ուկրաինայի համար G7-ի երաշխիքներն անվանել է «ոտնձգություն Ռուսաստանի անվտանգության դեմ»
Քաղաքականություն
12.07.2023 | 17:31
Ուկրաինային անվտանգության երաշխիքներ տալը «չափազանց սխալ է և պոտենցիալ վտանգավոր»։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
Նրա պնդմամբ՝ «Մեծ յոթնյակի» (G7) երկրներից ակնկալվող երաշխիքները «ոտնձգություն են Ռուսաստանի անվտանգության դեմ»։ Կրեմլի խոսնակն ընդգծել է, որ դա հղի է «շատ բացասական հետեւանքներով», գրում է Կոմերսանտը։
«Ուկրաինային անվտանգության երաշխիքներ տալով՝ այդ երկրները փաստացի անտեսում են անվտանգության անբաժանելիության միջազգային սկզբունքը։ Այսինքն՝ Ուկրաինային անվտանգության երաշխիքներ տալով՝ ոտնձգություն են անում Ռուսաստանի Դաշնության անվտանգության դեմ։ Դա անհնար է։ Եվ դա հղի է շատ և շատ բացասական հետևանքներով միջնաժամկետ, երկարաժամկետ և նույնիսկ կարճաժամկետ հեռանկարում»,- ասել է Պեսկովը մամուլի ասուլիսի ժամանակ։
Ավելի վաղ Սպիտակ տան Ազգային անվտանգության խորհրդի՝ Եվրոպայի գծով ավագ տնօրեն Ամանդա Սլոաթը հայտարարել էր, որ G7-ի անդամ երկրների առաջնորդներն այսօր կհայտարարեն Ուկրաինայի նկատմամբ անվտանգության միջազգային երկարաժամկետ երաշխիքների մասին։ Կհայտարարվի նաև G7-ի երկրների ծրագրերի մասին՝ օգնելու Ուկրաինային ստեղծել զինված ուժեր, որոնք կարող են պաշտպանել իրենց և կանխել ապագա հարձակումները։
Տաթև Ֆռանգյան
