07.10.2026 | 23:48
Արթուր Դանիելյանը կալանավորվեց
Նարիշկինը հայտնել է, որ ԿՀՎ ղեկավարի հետ հեռախոսազրույց է ունեցել Պրիգոժինի ապստամբության մասին
Քաղաքականություն
12.07.2023 | 19:28
ՌԴ Արտաքին հետախուզության ծառայության տնօրեն Սերգեյ Նարիշկինը ՏԱՍՍ-ի հետ զրույցում հաստատել է հունիսի վերջին ԱՄՆ Կենտրոնական հետախուզական վարչության ղեկավար Ուիլյամ Բերնսի հետ հեռախոսազրույցի փաստը։
«Այո՛, իսկապես զրույցը տեղի է ունեցել անցյալ ամսվա վերջին։ Հեռախոսազրույցի առիթը ամերիկացի գործընկերոջ կողմից, ինչպես ես եմ գնահատում, հունիսի 24-ի իրադարձություններն էին (խոսքը «Վագներ» մասնավոր ռազմական խմբավորման ղեկավար Եվգենի Պրիգոժինի կողմից հունիսի 24-ին ապստամբության ձախողված փորձի մասին է – խմբ․)։ Հասկանալի է, թե ինչպես եմ պատասխանել տեղի ունեցածի վերաբերյալ հարցին։ Ինձ թվում է, որ դա պատրվակ էր, քանի որ զրույցի հիմնական մասը կենտրոնացած էր Ուկրաինայի շուրջ թեմաների և իրադարձությունների քննարկման վրա։ Մտածում էինք, քննարկում՝ ինչ անել Ուկրաինայի հետ»,- ասել է Նարիշկինը։
Նա հավելել է, որ զրույցը տևել է մոտ մեկ ժամ։
«Մենք հեռախոսազրույցի ժամանակ հանդիպման մասին չենք պայմանավորվել, բայց նման հնարավորություն կա, մնում է՝ և՛ հեռախոսազրույցների, և՛ անձնական հանդիպման հնարավորությունը»,- ասել է Նարիշկինը։
Մեկնաբանելով մամուլում առկա տեղեկությունները, թե Բերնսը հունիսին այցելել է Կիև, նա նշել է․ «Մեր հեռախոսազրույցի ընթացքում Կիև այցի թեման որևէ կերպ չի շոշափվել»։
Հավելենք, որ ավելի վաղ ամերիկյան լրատվամիջոցները հայտնել էին, որ Բերնսը հեռախոսազրույց է ունեցել Նարիշկինի հետ Պրիգոժինի ապստամբության հետ կապված։ Նշվում է, որ նա ուղերձ է փոխանցել ռուսական կողմին, որ ԱՄՆ-ը կապ չունի այդ իրադարձությունների հետ, և դրանք Ռուսաստանի ներքին գործն են։
Էմմա Չոբանյան
