08.10.2026 | 15:55
Եթե միտում լիներ դահլիճ մտնելու, կմտնեին. Տիգրան Աբրահամյանը` օգնականների գործողությունների մասին․ ՏԵՍԱՆՅՈՒԹ
Ռուսաստանը կրկին հարվածներ է հասցրել Կիևին՝ ՆԱՏՕ-ի գագաթնաժողովին զուգահեռ
Քաղաքականություն
12.07.2023 | 11:41
Ռուսաստանը երկրորդ գիշերն անընդմեջ անօդաչու սարքերի օգնությամբ հարվածներ է հասցնում Կիևին և դրա շրջակայքին, հայտնել են ուկրաինացի զինվորականները։ Հարվածները հասցվել են նախագահ Վլադիմիր Զելենսկիի՝ Ուկրաինայի ինքնիշխանությանն աջակցող դաշինքի գագաթնաժողովում ՆԱՏՕ-ի ղեկավարների հետ սպասվող հանդիպումից մի քանի ժամ առաջ, գրում է VOA-ն։
Ուկրաինացի զինվորականների նախնական տեղեկություններով՝ զոհերի կամ մեծ ավերածությունների մասին տեղեկություններ չկան։ Բոլոր անօդաչու թռչող սարքերը որսացել են նախքան թիրախներին հասնելը։
«Ռուսաստանի Դաշնության՝ Ուկրաինա լայնամասշտաբ ներխուժման 504-րդ օրը հակառակորդը հերթական ավիահարվածն է հասցրել մայրաքաղաքին»,- Telegram-ում գրել է Կիևի քաղաքային ռազմական վարչակազմի ղեկավար Սերգեյ Պոպկովը։
Ականատեսները Reuters-ին պատմել են, որ Կիևում լսել են պայթյուններ, որոնք հիշեցնում են օդային թիրախները որսալու հակաօդային պաշտպանության համակարգերի ձայներ: Դեռևս պարզ չէ, թե Ռուսաստանը քանի անօդաչու թռչող սարք է բաց թողել և քանիսն է որսացել ուկրաինական կողմը։
Նշենք, որ Կիևում և ամբողջ Ուկրաինայում ավելի քան երկու ժամ հնչել են օդային հարվածների ազդանշաններ, երբ ՆԱՏՕ-ի առաջնորդները հավաքվել էին Վիլնյուսում՝ գագաթնաժողովի համար: Կրեմլը քննադատել է հանդիպումը՝ ասելով, որ Մոսկվան պատասխան քայլեր կձեռնարկի՝ սեփական անվտանգությունը պաշտպանելու համար:
