Հյուսիսային Կորեան ԱՄՆ-ին մեղադրել է իր օդային տարածքը խախտելու մեջ

Հյուսիսային Կորեայի Աշխատավորական կուսակցության կենտրոնական կոմիտեի ղեկավարի տեղակալ և առաջնորդ Կիմ Չեն Ընի քույրը՝ Կիմ Յո Չժոնգը հայտարարել է, որ ԱՄՆ-ի ռազմական հետախույզ-ինքնաթիռը ութ անգամ երկրի բացառիկ տնտեսական գոտի է մուտք գործել։ Այս մասին հայտնում է Reuters գործակալությունը՝ հղում կատարելով ԿԺԴՀ լրատվամիջոցներին, փոխանցում է DW-ի ռուսական ծառայությունը։

Ամերիկյան ուժերը կբախվեն «կրիտիկական թռիչքի», եթե շարունակեն «ապօրինի ներխուժումները», ասել է նա՝ կրկնելով նախօրեին հնչած մեղադրանքները, որ ԱՄՆ-ը խախտել է Հյուսիսային Կորեայի օդային տարածքը։ Բացի այդ, Կիմ Յո Չժոնգն ասել է, որ նման թռչող սարքերը կարող են խոցվել։

«Ոչ մի երաշխիք չկա, որ այնպիսի ցնցող միջադեպը, ինչպիսին է ԱՄՆ ռազմաօդային ուժերի ռազմավարական հետախուզական ինքնաթիռի խոցումը, տեղի չի ունենա»,- ավելի վաղ Reuters-ը վկայակոչել էր Հյուսիսային Կորեայի Պաշտպանության նախարարության անանուն պաշտոնյայի, ում հայտարարությունը տարածել էին տեղական լրատվամիջոցները:

Պենտագոնը հերքել է Հյուսիսային Կորեայի օդային տարածքը խախտելու՝ Փհենյանի մեղադրանքները և հայտարարել, որ ԱՄՆ զինված ուժերը հավատարիմ են միջազգային իրավունքի նորմերին։

«Այսպիսով, այդ մեղադրանքները պարզապես մեղադրանքներ են»,- լրագրողներին ասել է ԱՄՆ Պաշտպանության նախարարության խոսնակ Սաբրինա Սինգհը։

ԱՄՆ Պետքարտուղարության խոսնակ Մեթյու Միլլերն էլ հորդորել է Հյուսիսային Կորեային «ձեռնպահ մնալ էսկալացիոն գործողություններից» և կոչ արել «զբաղվել լուրջ և հետևողական դիվանագիտությամբ»։

Տաթև Ֆռանգյան