07.10.2026 | 23:19
Հայաստանը ՄԱԿ-ում ընդգծել է զարգացող երկրների համար միջազգային աջակցության և ֆինանսավորման կարևորությունը
Սպիտակ տունը հաստատել է Բայդեն-Զելենսկի հանդիպումը
Քաղաքականություն
11.07.2023 | 14:38
ԱՄՆ նախագահ Ջո Բայդենը Վիլնյուսում ՆԱՏՕ-ի գագաթնաժողովում կհանդիպի ուկրաինացի գործընկեր Վլադիմիր Զելենսկիի հետ։ Այս մասին հուլիսի 11-ին կայացած ճեպազրույցում հայտարարել է Սպիտակ տան ղեկավարի ազգային անվտանգության հարցերով խորհրդական Ջեյք Սալիվանը։
Նա նշել է, որ բանակցությունները կանցկացվեն չորեքշաբթի՝ հուլիսի 12-ին։
«Վաղը Բայդենը կհանդիպի Զելենսկիի հետ, նրանք կքննարկեն Միացյալ Նահանգների և այլ դաշնակիցների երկարաժամկետ հանձնառությունը՝ օգնելու Ուկրաինային պաշտպանել իրեն հիմա և կանխել ապագա ագրեսիան»,- ասել է Սալիվանը։
Բացի այդ, չորեքշաբթի տեղի կունենա Ուկրաինա-ՆԱՏՕ խորհրդի առաջին հանդիպումը, որի ժամանակ կքննարկվեն օգնության նոր փաթեթի տրամադրումը, Ուկրաինայի երկարաժամկետ կարիքները և Կիևի ու դաշինքի միջև ընդլայնվող փոխգործակցությունը։
Դաշնակիցները, ըստ Սալիվանի, կքննարկեն նաև Ուկրաինայի ապագա անդամակցությունը ՆԱՏՕ-ին։
«Ինչպես Բայդենն է ասել՝ եթե Ուկրաինան հիմա ընդունվի, ՆԱՏՕ-ին կներքաշի Ռուսաստանի հետ պատերազմի մեջ: Բացի այդ, Ուկրաինան դեռ պետք է որոշ բարեփոխումներ իրականացնի: Բայց դաշնակիցներն ընդհանուր դրական ազդանշան կտան դաշինքին Ուկրաինայի անդամակցության վերաբերյալ»,- ընդգծել է ամերիկացի պաշտոնյան:
Տաթև Ֆռանգյան
