24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
ՌԴ-ն գրեթե 30 կամիկաձե ԱԹՍ-ներով հարձակում է իրականացրել Օդեսայի շրջանի և Կիևի վրա
Քաղաքականություն
11.07.2023 | 12:28
Գիշերը Ուկրաինայի վրա օդային հարձակման ժամանակ Ռուսաստանն օգտագործել է իրանական արտադրության 28 «Շահեդ-136/131» հարվածային անօդաչու թռչող սարք, որոնցից 26-ը խոցվել են։ Այս մասին ասվում է Ուկրաինայի Զինված ուժերի ռազմաօդային ուժերի առավոտյան ամփոփագրում։ Բացի այդ, խոցվել է Zala տիպի մեկ հետախուզական անօդաչու թռչող սարք, պնդում են ուկրաինացի զինվորականները, փոխանցում է BBC-ի ռուսական ծառայությունը։
Երկուշաբթի լույս երեքշաբթի գիշերը օդային տագնապ է հայտարարվել Կիևում, Կիևի, Օդեսայի, Նիկոլաևի, Կիրովոգրադի, Պոլտավայի, Խարկովի և Չերկասի շրջաններում։
Օդեսայի մարզում «Շահեդ-136» տիպի անօդաչու սարքերը հարձակվել են նավահանգստում հացահատիկի տերմինալի վրա, պնդում է «Հարավ» օպերատիվ հրամանատարության խոսնակ Վլադիսլավ Նազարովը։ Նրա խոսքով՝ ռուս զինվորականները «անօդաչու թռչող սարքերով հզոր հարձակում են իրականացրել Ուկրաինայի հարավում»։
«Հակառակորդը Սև ծովից ուղարկել է «Շահեդ-136» տիպի հարձակողական անօդաչու թռչող սարքերի մի քանի ալիք։ Հարավային հակաօդային պաշտպանության ուժերի կողմից ոչնչացվել է 22 մարդասպան-անօդաչու թռչող սարք, երկուսը հարվածել են նավահանգստի վարչական շենքին»,- Նազարովի խոսքերն է մեջբերում «Ինտերֆաքս-Ուկրաինան»:
Ըստ նրա՝ խոցված անօդաչու թռչող սարքերի բեկորների անկման հետևանքով նավահանգստի երկու տերմինալներ, ներառյալ՝ հացահատիկի տերմինալը, հրդեհվել են։ Կրակն արագ մարվել է, լուրջ վնասներ և զոհեր չկան։
Ավելի վաղ Կիևի քաղաքային ռազմական վարչակազմի ղեկավար Սերգեյ Պոպկոն հայտարարել էր, որ Կիևը հուլիսին երկրորդ անգամ ենթարկվել է օդային հարձակման։ Նախնական տվյալներով՝ ամսվա սկզբին հակառակորդը կիրառել էր «Շահեդ» կամիկաձե անօդաչու թռչող սարքեր, որոնք արձակվել են հարավից (Ուկրաինայի զինված ուժերը նույնպես նշում են, որ անօդաչուներն ուղարկվել են երկրի հարավից)։
Հարվածային անօդաչու թռչող սարքերի բեկորներն ընկել են Կիևի մարզի երկու թաղամասերում, ասվում է Արտակարգ իրավիճակների պետական ծառայության հաղորդագրությունում։ Վնասվել են մասնավոր տնային տնտեսություններ։
Զոհերի մասին տեղեկություն չի ստացվել, հայտնել են Ուկրաինայի ՆԳՆ-ից՝ հրապարակելով լուսանկար։ Ոստիկանության տվյալներով՝ Կիևի մարզում վնասվել է 12 առանձնատուն և մեկ բարձրահարկ շենք։
