06.06.2026 | 10:42
«Պիտի մինիմում մե 10 ձեն բերե». ՀԿԿ-ն նոր գաղտնալսում է հրապարակել
Իրանի և Ադրբեջանի հարաբերություններում սառույցը հալվում է․ կողմերը խոսում են դրական օրակարգին վերադառնալու մասին
Քաղաքականություն
10.07.2023 | 16:25
Վերջին ամիսներին Թեհրանի և Բաքվի հարաբերություններում առկա սառույցն աստիճանաբար հալվում է։ Մասնավորապես, Ադրբեջանի ԱԳ նախարար Ջեյհուն Բայրամովը լրագրողների հետ զրույցում խոսելով հարաբերություններում լարվածության մասին՝ հայտարարել է, որ «Իրանը հարևան պետություն է, և Բաքուն միշտ շահագրգռված է եղել Թեհրանի հետ հարաբերությունների դրական զարգացմամբ»։
«Իրանի ԱԳ նախարար Հուսեյն Ամիր Աբդոլահիանի՝ նախագահ Իլհամ Ալիևի հետ հանդիպման ժամանակ հնարավորություն ստեղծվեց բաց քննարկելու հարաբերությունները։ Մենք տեսնում և զգում ենք Իրանի մտադրությունը՝ լուրջ քայլեր ձեռնարկել երկու երկրների միջև տարաձայնությունները լուծելու համար։ Այս դեպքում ադրբեջանական կողմը նույնպես համարժեք քայլեր կձեռնարկի»,- ասել է Բայրամովը։
Նա նշել է, որ Բաքուն պնդում է՝ Թեհրանում Ադրբեջանի դեսպանատան հարձակման հետ առնչություն ունեցողները պետք է արժանի պատիժ կրեն։
Բայրամովը նաև հայտնել է, որ առաջիկայում իրանական Աստարայում տեղի կունենա Ադրբեջանի և Իրանի միջև տնտեսական, առևտրային և հումանիտար ոլորտներում համագործակցության պետական հանձնաժողովի համանախագահների հանդիպումը։
«Սպասվում են բանակցություններ մի շարք հարցերի, այդ թվում՝ տրանսպորտի, ջրային ռեսուրսների համատեղ օգտագործման շուրջ»,- ասել է նա։
Հավելենք, որ օրերս Իրանի ԱԳ նախարար Հոսեյն Ամիր Աբդոլահիանը, որը Բաքվում մասնակցում էր Չմիավորման շարժման կազմակերպության համակարգող բյուրոյի նախարարական հավաքին, հանդիպել էր Ադրբեջանի նախագահ Իլհամ Ալիևին, որը վերջին շրջանում պարբերաբար հակաիրականական հռետորաբանությամբ է հանդես գալիս։
Աբդոլահիանը Բաքվում լրագրողների հետ զրույցում հայտնել էր, որ կողմերը պայմանավորվել են տնտեսական նախագծերը շարունակել, արագացնել Իրանի տարածքով Ադրբեջանն ու Նախիջևանը կապող միջանցքի գործարկումը։ Նա նաև ասել էր, որ Իրանը կողմ է Հարավային Կովկասում տրանսպորտային ուղիների ապաշրջափակմանը, սակայն դեմ է սահմանների փոփոխությանը։
Հիշեցնենք՝ երկու երկրների հարաբերությունները բավական լարված են։ Ադրբեջանի ԱԳՆ-ն իր քաղաքացիներին հորդորել է Իրան չայցելել։ Վերջերս նաև տեղեկություններ էին տարածվել, որ Իրանում ձերբակալվել է Ադրբեջանի քաղաքացի Ֆարիդ Սաֆարլին՝ լրտեսության մեղադրանքով։ Իր հերթին, Բաքուն շարունակվում է կրոնական տարբեր գործիչների ձերբակալությունները՝ Իրանի օգտին լրտեսություն կատարելու կասկածանքով։ Հունիսի 23-ից էլ Ադրբեջանը դադարեցրել է Իրանի քաղաքացիներին վիզաների տրամադրումն իր օդանավակայաններում։ Բացի այդ, հունվարից՝ Թեհրանում Ադրբեջանի դեսպանատան վրա զինված հարձակումից հետո, Բաքուն փակել է իր դիվանագիտական ներկայացուցչությունն Իրանում։
Էմմա Չոբանյան
