17.12.2025 | 23:55
ՊՍԺ-ն՝ Միջմայրցամաքային գավաթի հաղթող․ ՏԵՍԱՆՅՈՒԹ
ՆԱՏՕ-ի գագաթնաժողովին ընդառաջ Ջո Բայդենն ու Էրդողանը հեռախոսազրույց են ունեցել
Քաղաքականություն
10.07.2023 | 11:31
ԱՄՆ նախագահ Ջո Բայդենն ու Թուրքիայի նախագահ Ռեջեփ Թայիփ Էրդողանը Վիլնյուսում կայանալիք ՆԱՏՕ-ի գագաթնաժողովից առաջ հեռախոսազրույց են ունեցել։ Սպիտակ տան հաղորդմամբ՝ կողմերը քննարկել են հարցերի շրջանակ, որոնց ՆԱՏՕ-ի ղեկավարներն անդրադառնալու են գագաթնաժողովում, հայտնել իրենց համատեղ հանձնառությունը՝ շարունակելու աջակցել Ուկրաինային և վերանայել երկկողմ հարաբերությունների ամրապնդման ջանքերը։
«Նախագահ Բայդենը նաև իր ցանկությունն է հայտնել հնարավորինս շուտ ողջունել Շվեդիային ՆԱՏՕ-ում»,- ասվում է հաղորդագրության մեջ։
Ըստ թուրքական կողմի հաղորդագրության՝ կողմերը քննարկել են ՆԱՏՕ-ին Ուկրաինայի հնարավոր անդամակցության հետ կապված իրավիճակը, դաշինքին Շվեդիայի անդամակցության հեռանկարները, Թուրքիային F-16 կործանիչների մատակարարումը, ԵՄ-ին Անկարայի լիիրավ անդամակցության գործընթացը։
Թուրքական կողմի համաձայն՝ նախագահները պայմանավորել են Վիլնյուսում կայանալիք ՆԱՏՕ-ի գագաթնաժողովում հանդիպում անցկացնել՝ մանրամասն քննարկելու երկկողմ հարաբերությունները և տարածաշրջանային խնդիրները։
Էրդողանը նաև նշել է, թե «սխալ է Թուրքիային F-16-ի մատակարարումը կապել Շվեդիայի՝ ՆԱՏՕ-ին անդամակցելու հետ»։
Նա նաև ընդգծել է, որ Անկարան հավատարիմ է ԵՄ անդամակցության հարցում սկզբունքային և ազնիվ վերաբերմունքին ու հույս հայտնել, որ Վիլնյուսում կայանալիք ՆԱՏՕ-ի գագաթնաժողովի ընթացքում ԵՄ առաջատար երկրները հստակ և ուժեղ ազդանշան կտան միությանը Թուրքիայի անդամակցությանն աջակցության հարցում։
Հավելենք, որ Վիլնյուսում ՆԱՏՕ-ի գագաթնաժողովը տեղի կունենա հուլիսի 11-12-ը։
Էմմա Չոբանյան
