07.10.2026 | 23:48
Արթուր Դանիելյանը կալանավորվեց
Human Rights House-ն անցանկալի կազմակերպություն է ճանաչվել Ռուսաստանում
Քաղաքականություն
07.07.2023 | 18:05
Ռուսաստանի Գլխավոր դատախազությունն «անցանկալի» է ճանաչել Human Rights House Foundation (HRHF) միջազգային իրավապաշտպան կազմակերպությունը և դրա անդամ հասարակական կազմակերպություններին, գրում է Մեդիազոնան։
Ըստ Դատախազության՝ HRHF -ի գործունեությունն «ուղղված է պետության տարածքային ամբողջականության ոտնահարմանը, հասարակական-քաղաքական իրավիճակի ապակայունացմանը, երկրի ղեկավարության վարած ներքին և արտաքին քաղաքականության վարկաբեկմանը և հակասահմանադրական ճանապարհով իշխանությունը փոխելու անհրաժեշտության մասին հասարակական կարծիք ձևավորելուն»։
Human Rights House հիմնադրամը հասարակական կազմակերպություն է, որի կենտրոնակայանը Նորվեգիայում է։ Այն միավորում է Արևելյան Եվրոպայի, Բալկանյան տարածաշրջանի և Կովկասի Մարդու իրավունքների տների և այլ իրավապաշտպան խմբերի ցանցը: Մասնավորապես, «Մարդու իրավունքների տունը» գործում է Ուկրաինայում, Վրաստանում, Հայաստանում, իսկ Լիտվայում գործում է «Բորիս Զվոզսկովի անվան մարդու իրավունքների Բելառուսի տունը», որի հիմնական խնդիրը Բելառուսում մարդու իրավունքների պաշտպանությունն է։
«Հատուկ ռազմական օպերացիայի սկզբից HRHF-ը զբաղվել է Ռուսաստանի Դաշնության և ՌԴ զինված ուժերի արտաքին քաղաքականության վարկաբեկմամբ: ՀԿ-ների սադրիչ տեղեկատվական օրակարգն ուղղված է Ռուսաստանի քաղաքական և տնտեսական մեկուսացմանը միջազգային ասպարեզում»,- ասված է Գլխավոր դատախազության հաղորդագրության մեջ։
Տաթև Ֆռանգյան
