26.06.2026 | 23:30
Հունիսի 29-ին Հայաստանի մի շարք հասցեներում էլեկտրաէներգիայի անջատումներ կլինեն
Պենտագոնում կարծում են, որ Պրիգոժինն իր նմանակներին օգտագործում է՝ տեղաշարժը թաքցնելու համար․ NYT
Քաղաքականություն
07.07.2023 | 19:23
Ռուսական «Վագներ» մասնավոր ռազմական խմբավորման հիմնադիր ու ղեկավար Եվգենի Պրիգոժինն իսկապես ապստամբությունից հետո երկար ժամանակ գտնվել է Ռուսաստանում՝ շարժվելով հիմնականում Մոսկվայի և Սանկտ Պետերբուրգի միջև։ Այս մասին The New York Times-ին ասել է Պենտագոնի պաշտոնյաներից մեկը՝ անանունության պայմանով, փոխանցում է BBC-ի ռուսական ծառայությունը։
Պաշտոնյայի խոսքով՝ պարզ չէ՝ արդյո՞ք Պրիգոժինն իսկապես մեկնել է Բելառուս, քանի որ նա, ինչպես երևում է, իր նմանակներին է օգտագործում՝ տեղաշարժը թաքցնելու համար։
Հունիսի 27-ին Ալեքսանդր Լուկաշենկոն հայտնել էր, որ Պրիգոժինը Բելառուսի տարածքում է։
Հուլիսի 6-ին էլ, պատսխանելով հարցին, թե որտեղ են այժմ «Վագներ»-ի վարձկաններն ու Պրիգոժինը, Լուկաշենկոն պատասխանել էր. «Սա ռուսական ընկերություն է։ Այսպիսով, հարցն ակնհայտորեն ինձ չպետք է ուղղել։ Որքան տեղյակ եմ՝ մարտիկներն իրենց ճամբարներում են։ Ինչ վերաբերում է Պրիգոժինին, ապա նա Սանկտ Պետերբուրգում է, Բելառուսի տարածքում չէ»։
Կրեմլում դրանից հետո հայտարարել էին, որ «հնարավորություն ու ցանկություն չունեն» հետևելու Պրիգոժինի տեղաշարժին։ ՌԴ նախագահի խոսնակ Դմիտրի Պեսկովը հրաժարվել էր մեկնաբանել Պրիգոժինի գտնվելու վայրի մասին հարցը։
Հիշեցնենք, որ «Վագների» զինյալները Պրիգոժինի գլխավորությամբ ապստամբություն էին սկսել և Դոնի Ռոստովից շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվելու էին Բելառուս, իսկ Պրիգոժինի նկատմամբ հարուցված քրեական գործը կարճվելու էր։
Էմմա Չոբանյան
