Քաղաքականություն
07.07.2023 | 16:18
Մոսկվան ուշադիր հետևելու է Թուրքիայի նախագահ Ռեջեփ Թայիփ Էրդողանի և Ուկրաինայի նախագահ Վլադիմիր Զելենսկու բանակցություններին, Կրեմլի համար հետաքրքիր է իմանալ՝ ինչ է քննարկվելու։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, գրում է ՌԻԱ Նովոստին։
«Իհարկե, մենք ուշադրությամբ հետևելու ենք այդ բանակցությունների արդյունքներին։ Մենք պահպանում ենք մեր կառուցողական գործընկերային հարաբերություններն Անկարայի հետ, գնահատում ենք այդ հարաբերությունները և զգում փոխադարձությունը թուրքական կողմից: Ուստի, իհարկե, մեզ հետաքրքիր կլինի իմանալ, թե ինչ են քննարկվելու պարոն Էրդողանի և պարոն Զելենսկիի միջև։ Դա կարևոր է»,- ասել է լրագրողներին Պեսկովը։
Նա նշել է, որ Էրդողանը բազմիցս մեծ ջանքեր է գործադրել ուկրաինական հակամարտության համատեքստում տարբեր խնդիրների լուծման համար, միջնորդական դեր է կատարել, և այդ դերը բարձր է գնահատվել Ռուսաստանի նախագահի կողմից։
Հավելենք, որ Զելենսկին այսօր մեկնել է Ստամբուլ՝ հանդիպելու Թուրքիայի նախագահ Ռեջեփ Թայիփ Էրդողանին։ Էրդողանն ու Զելենսկին առանձնազրույց կունենան, նաև պատվիրակությունների ընդլայնված կազմով բանակցություններ կանցկացնեն։ Քննարկվելու են ռուս-ուկրաինական պատերազմի վերջին զարգացումները, հիմնական թեման լինելու է սևծովյան հացահատիկային գործարքը, որի ժամկետը լրանում է հուլիսի 17-ին։
Էմմա Չոբանյան
