07.10.2026 | 23:48
Արթուր Դանիելյանը կալանավորվեց
Զելենսկիի հետ բանակցություններից հետո Էրդողանը կարող է հանդիպել Պուտինին
Քաղաքականություն
07.07.2023 | 15:08
Թուրքական A Haber-ը Ուկրաինայի նախագահ Վլադիմիր Զելենսկիի՝ Թուրքիա այցի վերաբերյալ հրապարակում է արել՝ հայտնելով նաև ՌԴ նախագահ Վլադիր Պուտինի հետ նախագահ Ռեջեփ Թայիփ Էրդողանի հնարավոր հանդիպման մեծ հավանականության մասին։
Նշվում է, որ Թուրքիայի նախագահ Էրդողանն այն առաջնորդներից է, որն ամենաշատն է հանդիպել ինչպես Ռուսաստանի նախագահ Վլադիմիր Պուտինի, այնպես էլ Ուկրաինայի նախագահ Վլադիմիր Զելենսկիի հետ։ Ռուս-ուկրաինական պատերազմում իր միջնորդական ջանքերի շրջանակում Թուրքիան շարունակում է կողմերի միջև շուտափույթ հրադադար ապահովելու առաջարկներ ներկայացնել։
«Հավանական է, որ Զելենսկիի հետ բանակցություններից հետո նախագահ Էրդողանը դեմ առ դեմ կհանդիպի Ռուսաստանի առաջնորդ Վլադիմիր Պուտինի հետ: Այս հանդիպումը կարող է կայանալ ինչպես Թուրքիայում, այնպես էլ Ռուսաստանում: Դրա հավանականությունը մեծ է»,- գրում է լրատվամիջոցը։
Հավելենք, որ Զելենսկին այսօր մեկնել է Ստամբուլ՝ հանդիպելու Թուրքիայի նախագահ Ռեջեփ Թայիփ Էրդողանին։ Էրդողանն ու Զելենսկին առանձնազրույց կունենան, նաև պատվիրակությունների ընդլայնված կազմով բանակցություններ կանցկացնեն։ Քննարկվելու են ռուս-ուկրաինական պատերազմի վերջին զարգացումները, հիմնական թեման լինելու է հացահատիկային գործարքը, որի ժամկետը լրանում է հուլիսի 17-ին։ Քննարկման առանցքում կլինեն նաև երկու երկրների հարաբերություններին առնչվող հարցեր։
Էմմա Չոբանյան
