14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Իրաքում առևանգել են իսրայելցի հայտնի լրագրողի, որը բացահայտում էր 44-օրյա պատերազմում Ադրբեջանի կողմից սիրիացի վարձկանների ներգրավումը
Քաղաքականություն
06.07.2023 | 21:28
Մի քանի ամիս առաջ Իրաքում անհետացած Իսրայելի և Ռուսաստանի քաղաքացի Էլիզաբեթ Ցուրկովը պատանդ է վերցվել շիաների «Քաթայիբ Հըզբոլլահ» խմբավորման կողմից։ Այս մասին հայտնել է Իսրայելի վարչապետ Բենիամին Նեթանյահուի գրասենյակը, գրում է DW-ի ռուսական ծառայությունը։
«Էլիզաբեթ Ցուրկովը դեռ ողջ է, մենք կարծում ենք, որ նրա ճակատագրի և անվտանգության պատասխանատվությունը կրում է Իրաքը»,- ասվում է հայտարարության մեջ։
Իսրայելի համապատասխան մարմինները զբաղվում են խնդրով։
Նշվում է, որ Ցուրկովը գիտնական է, որը մեկնել է Իրաք սեփական նախաձեռնությամբ՝ դոկտորական ատենախոսություն գրելու և ԱՄՆ Փրինսթոնի համալսարանի համար հետազոտություններ կատարելու նպատակով։ Քանի որ Իսրայելի քաղաքացիներին թույլ չեն տալիս մուտք գործել Իրաք, նա օգտագործել է իր ռուսական անձնագիրը։
Հավելենք, որ Ցուրկովը նաև լրագրող է, Մերձավոր Արևելքի ուսումնասիրություններով հայտնի հետազոտող։ Նա առաջիններից էր, որն Արցախյան 44-օրյա պատերազմից առաջ ու դրա ընթացքում բացահայտում և լուսաբանում էր, թե ինչպես է Թուրքիան սիրիացի վարձկաններին տեղափոխում Ադրբեջան՝ ԼՂ-ի դեմ ագրեսիային մասնակցելու համար։ Նա նման բովանդակությամբ մի շարք հրապարակումներ ունի։
Իսրայելցի անանուն դիվանագետն էլ Jerusalem Post-ին հայտնել է, որ Ցուրկովն անհետ կորել է մարտից: Թվիթերում նրա վերջին գրառումն արված է մարտի 21-ին:
Էմմա Չոբանյան
