Լուկաշենկոն հայտնել է, որ Պրիգոժինն այժմ Պետերբուրգում է

Բելառուսի նախագահ Ալեքսանդր Լուկաշենկոն հայտարարել է, որ «Վագներ» մասնավոր ռազմական խմբավորման հիմնադիր ու ղեկավար Եվգենի Պրիգոժինն այժմ ոչ թե Բելառուսում է, այլ Սանկտ Պետերբուրգում, գրում է BBC-ի ռուսական ծառայությունը։

Պատասխանելով հարցին, թե որտեղ են այժմ վարձկաններն ու Պրիգոժինը, նա պատասխանել է. «Դա ռուսական ընկերություն է, այդ պատճառով հարցն ինձ չպետք է ուղղել։ Որքանով տեղյակ եմ՝ նրանք հիմա գտնվում են իրենց ճամբարներում։ Ինչ վերաբերում է Պրիգոժինին, նա Պետերբուրգում է»։

Լուկաշենկոն նշել է, որ վարձկաններին առաջարկել են  տեղակայվել նախկին ռազմական ավաններում, բայց նրանք հրաժարվել են։ Բելաառուսի ղեկավարը նաև հավելել է, որ մտադիր է առաջիկայում հանդիպել ՌԴ նախագահ Վլադիմիր Պուտինին ու քննարկել «Վագների» թեման։

Հիշեցնենք, որ ավելի վաղ Լուկաշենկոն հայտարարել էր, որ Պրիգոժինը Բելառուսում է։

Նախօրեին էլ «Фонтанка»-ն, հղում անելով իր աղբյուրներին, հայտնել էր, որ Եվգենի Պրիգոժինը չորեքշաբթի այցելել է Սանկտ Պետերբուրգի և Լենինգրադի շրջանի ԱԴԾ վարչություն, որտեղ նրան վերադարձրել են զենքն ու խուզարկությունների ժամանակ առգրավված 10 միլիարդ ռուբլին։

Հիշեցնենք, որ «Վագների» զինյալները Պրիգոժինի գլխավորությամբ ապստամբություն էին սկսել և Դոնի Ռոստովից շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվելու էին Բելառուս, իսկ Պրիգոժինի նկատմամբ հարուցված քրեական գործը կարճվելու էր։

Էմմա Չոբանյան