Քաղաքականություն
06.07.2023 | 15:08
ԱՄՆ նախագահ Ջո Բայդենը Շվեդիայի վարչապետ Ուլֆ Քրիստերսոնի հետ բանակցությունների ժամանակ իր աջակցությունն է հայտնել ՆԱՏՕ-ին Ստոկհոլմի անդամակցությանը, գրում է Gercek news-ը։
Բայդենը, որը պատրասվում է եվրոպական շրջագայության ՆԱՏՕ-ի գագաթնաժողովի շրջանակում, Սպիտակ տանը Շվեդիայի վարչապետի հետ հանդիպմանը հայտարարել է․ «Անհամբերությամբ սպասում եմ ՆԱՏՕ-ին ձեր անդամակցությանը»։
Հանդիպումից հետո շվեդ պաշտոնյան ընդգծել է, որ երկու երկրների ղեկավարները համաձայնել են, որ Վիլնյուսի գագաթնաժողովը «բնական ժամանակն» է դաշինքին միանալու Շվեդիայի հայտն ավարտին հասցնելու համար։ Նա, սակայն, նշել է, որ վերջնական որոշումը Թուրքիայինն է։
Սպիտակ տան հաղորդագրության մեջ էլ ասվում է, որ նախագահ Բայդենը «բարձր է գնահատել Շվեդիայի դերը որպես տարածաշրջանային անվտանգություն ապահովող երկիր և ընդգծել ՆԱՏՕ-ում հնարավորինս շուտ Ստոկհոլմին ողջունելու իր հանձնառությունը»:
ԱՄՆ նախագահի այս հրապարակային հավանությունն արտացոլում է Միացյալ Նահանգների և նրա դաշնակիցների շարունակական ջանքերը՝ հաղթահարելու Շվեդիայի անդամակցությանը Թուրքիայի դիմադրությունը:
Հավելենք, որ հուլիսի 11-12-ը Վիլնյուսում կայանալիք ՆԱՏՕ-ի գագաթնաժողովին ընդառաջ Շվեդիայի, Թուրքիայի և ՆԱՏՕ-ի ներկայացուցիչներն այսօր հանդիպելու են Բրյուսելում՝ վճռորոշ քննարկումների համար: Հանդիպման նպատակն է՝ լուծել Թուրքիայի մտահոգությունները և հասնել փոխհամաձայնեցված լուծման, որը հնարավորություն կտա Շվեդիային անդամակցել ՆԱՏՕ-ին: Այս հանդիպման արդյունքն էականորեն կազդի Շվեդիայի՝ ՆԱՏՕ-ի նոր անդամ դառնալու հեռանկարների վրա։
Էմմա Չոբանյան
