Քաղաքականություն
06.07.2023 | 16:20
ՌԴ իրավապահ մարմինները «Վագներ» մասնավոր ռազմական ընկերության ղեկավար Եվգենի Պրիգոժինի տանը և գրասենյակում խուզարկության ժամանակ հայտնաբերել են կեղծամներ, զենք, ոսկու ձուլակտորներ, խոշոր գումարներ և կեղծ անձնագրեր, գրում է Lenta-ն։
Նշվում է նաև, որ Պրիգոժինի տունն ունի սեփական ուղղաթիռային հարթակ, լողավազան, շոգեբաղնիք և մարզասրահ։
Բացի այդ, River Palace հյուրանոցի մոտ հայտնաբերվել է Citroen միկրոավտոբուս՝ վեց միլիարդ ռուբլի կանխիկ գումարով։
Ավելի վաղ մամուլում տեղեկություններ էին հայտնվել, որ Պրիգոժինին են վերադարձրել կանխիկ գումարով արկղերը, որոնք առգրավվել էին Պետերբուրգում զինված ապստամբության քրեական գործի շրջանակում խուզարկության ժամանակ։ Ընդհանուր առմամբ, նրան վերադարձվել է տասը միլիարդ ռուբլի և հարյուր հազարավոր դոլար կանխիկ գումար, ինչպես նաև ոսկու հինգ ձուլակտոր։
Հիշեցնենք, որ «Վագների» զինյալները Պրիգոժինի գլխավորությամբ ապստամբություն էին սկսել և Դոնի Ռոստովից շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվելու էին Բելառուս, իսկ Պրիգոժինի նկատմամբ հարուցված քրեական գործը կարճվելու էր։
Էմմա Չոբանյան
