Ռուսական ինքնաթիռները Սիրիայում հետապնդել են ամերիկյան ԱԹՍ-ները․ ՏԵՍԱՆՅՈՒԹ

Սիրիայի երկնքում ռուսական կործանիչները հուլիսի 5-ին վտանգավոր հեռավորությամբ անցել են ամերիկյան ԱԹՍ-ների կողքով, ինչի հետևանքով դրանք շեղվել են երթուղուց։ Այս մասին հայտնել են  ԱՄՆ ռազմաօդային ուժերը, փոխանցում է DW-ի ռուսական ծառայությունը։

ԱՄՆ ռազմաօդային ուժերի կենտրոնական հրամանատարությունը տեսանյութ է հրապարակել, որում երևում է, թե ինչպես է ռուսական ՍՈՒ-35-ը մոտենում ամերիկյան MQ-9 Reaper-ին։ Այնուհետև նկատվում են մի քանի պարաշյուտային ազդանշանային հրթիռներ, որոնք շարժվում են անօդաչուի թռիչքի ճանապարհով։

Regarding Russia’s unprofessional behavior while reacting with U.S. aircraft over Syria, please see the video of today’s encounter.
For the full statement by Lt. Gen. Alex Grynkewich, Commander, 9th AF (AFCENT) visithttps://t.co/WKDYPiPT96@CENTCOM @DeptofDefense @usairforce pic.twitter.com/nmSSBxUojO

— US AFCENT (@USAFCENT) July 5, 2023

«Մինչ ԱՄՆ երեք MQ-9 անօդաչու թռչող սարքերը առաքելություն էին իրականացնում «Իսլամական պետության» դեմ, ռուսական երեք կործանիչներ սկսեցին հետապնդել նրանց»,-ասվում է ԱՄՆ ռազմաօդային ուժերի գեներալ-լեյտենանտ Ալեքսուս Գրիկևիչի հայտարարության մեջ։

Նրա խոսքով՝ ռուսական ինքնաթիռները  մի քանի ազդանշանային հրթիռներ են նետել անօդաչուների մոտ, իսկ «ռուս օդաչուներից մեկն իր ինքնաթիռը տեղավորել է MQ-9-ի դիմաց և միացրել ֆորսաժային խցիկը՝ այդպիսով նվազեցնելով ԱԹՍ-ն անվտանգ կառավարելու՝ օպերատորի հնարավորությունը»։

Ամերիկացի գեներալը ռուսական կործանիչների մանևրն անվանել է «վտանգավոր ու ոչ պրոֆեսիոնալ»՝ կոչ անելով «դադարեցնել այդ անխոհեմ պահվածքը»։