17.03.2026 | 23:25
ԻՀՊԿ-ն հաստատել է «Բասիջ» ուժերի հրամանատար Ղոլամռեզա Սուլեյմանիի մահը
Պատժամիջոցների պատճառով ՌԴ-ում սպառվում են Ան-2 ինքնաթիռների պահեստամասերը․ թռիչքները կարող են դադարեցվել
Քաղաքականություն
05.07.2023 | 19:22
Ռուսական ավիաընկերությունները, որոնք շահագործում են Ան-2 ինքնաթիռները, բախվում են պահեստամասերի պակասի խնդրի։ Այս մասին գրում է РБК-ն, որին վկայակոչում է Meduza-ն։
Նշվում է, որ նախքան Ուկրաինա լայնամասշտաբ ներխուժումը և դրան հետևած պատժամիջոցները պահեստամասերը մատակարարվում էին Եվրոպայից։
Պահեստամասերի պակասը, ինչպես հայտնի է դարձել լրատվամիջոցին, քննարկվել է հունիսի վերջին տեղի ունեցած Պետխորհրդի «Օդային փոխադրումների և տարածաշրջանային օդանավակայանների զարգացում» հանձնաժողովի աշխատանքային խմբի նիստում։ Դրա ընթացքում Մոսկվայի ավիացիոն վերանորոգման գործարանի գլխավոր տնօրեն Պավել Նենաստևը հայտարարել է Ռուսաստանում այդ ինքնաթիռների համար շուրջ 60 բաղադրիչ արտադրելու անհրաժեշտության մասին։ Նա լրատվամիջոցին ասել է, որ եթե քայլեր չձեռնարկվեն, գործարանները «կարող են պարզապես դադարել ծառայություններ մատուցել», ինչը սպառնում է նաև թռիչքների դադարեցմանը։
Նախատեսվում է, որ Ան-2-ը, որի զանգվածային արտադրությունը սկսվել է 1949 թվականին, փոխարինվելու է «Բայկալ» ինքնաթիռով, որը մշակում է Ուրալի քաղաքացիական ավիացիոն գործարանը։
Եթե հնարավոր լինի ինքնաթիռների համար պահեստամասերի արտադրություն հիմնել, ապա, ըստ լրատվամիջոցի, դրանք հնարավոր կլինի շահագործել առանց խնդիրների ևս 10-15 տարի։
Էմմա Չոբանյան
