07.10.2026 | 23:00
Երթևեկության կազմակերպման փոփոխություն՝ Հակոբ Պարոնյան փողոցում
ՌԴ-ն և Ուկրաինան միմյանց մեղադրում են Զապորոժիեի ԱԷԿ-ում դիվերսիա նախապատրաստելու մեջ
Քաղաքականություն
05.07.2023 | 18:52
Զապորոժիեի ԱԷԿ-ի շուրջ իրավիճակը կրկին սրվել է։ Նախօրեին Մոսկվան և Կիևը միմյանց մեղադրել են Ռուսաստանի կողմից վերահսկվող կայանի վրա հարձակում ծրագրելու մեջ, գրում է Euronews-ը։
Ավելի վաղ Ուկրաինայի Պաշտպանության նախարարության հետախուզության գլխավոր վարչությունը հայտնել էր, որ Ռուսաստանը կրճատում է իր ներկայությունը Զապորոժիեի ԱԷԿ-ում։ Ըստ գերատեսչության՝ Ռոսատոմի մի քանի ներկայացուցիչներ արդեն հեռացել են, ատոմակայանում մնացած ուկրաինացի աշխատակիցներին էլ հրահանգել են տարհանվել, ցանկալի է՝ Ղրիմ։
Իր վերջին ուղերձում նախագահ Վլադիմիր Զելենսկին, հղում անելով հետախուզական տվյալներին, ասել է, որ ռուս զինվորականները Զապորոժիեի ատոմակայանի մի քանի էներգաբլոկների տանիքին պայթուցիկի նմանվող իրեր են տեղադրել։ Մոտակա Զապորոժիե քաղաքում անցկացվում են դասընթացներ, որոնց նպատակն է մարդկանց սովորեցնել՝ ինչ անել միջուկային աղետի դեպքում։ Մի խումբ լրագրողներ մասնակցել են դասընթացին, որտեղ նրանց ցույց են տվել, թե ինչպես հավաքել շտապ օգնության ճամպրուկ և ինչպես պատրաստել դեմքի ինքնաշեն դիմակ։
Ըստ իշխանությունների՝ Ուկրաինայի հարավում ժամանակավորապես օկուպացված տարածքների բնակիչներն առանձնակի վտանգի տակ են։
Մինչ այդ, ուկրաինացի զինվորականները հրապարակել են «Գրադ» հրթիռային կայանի կիրառման կադրերը։
Նշվում է, որ Կիևը հավակնում է տարածքային նվաճումների, սակայն արևմտյան դաշնակիցներն ասում են, որ լիարժեք հակահարձակումը դեռ առջևում է։ Պատճառներից մեկը ռուսական ականներն են, որոնք դանդաղեցնում են ուկրաինական զորքերի առաջխաղացումը։
