16.05.2026 | 09:51
«Բավարիան» նոր պայմանագիր է կնքել Մանուել Նոյերի հետ․ ՏԵՍԱՆՅՈՒԹ
Սի Ցզինպինն անձամբ է զգուշացրել Պուտինին՝ զերծ մնալ միջուկային հարվածից․ FT
Քաղաքականություն
05.07.2023 | 15:34
Չինաստանի նախագահ Սի Ցզինպինը մարտին Մոսկվա կատարած այցի ժամանակ անձամբ է նախազգուշացրել ՌԴ նախագահ Վլադիմիր Պուտինին Ուկրաինայում միջուկային զենքի հնարավոր կիրառման հետևանքների մասին։ Այս մասին հայտնում է Financial Times-ը՝ վկայակոչելով անանուն արևմտյան և չինացի պաշտոնյաների, փոխանցում է DW-ի ռուսական ծառայությունը։
Նշվում է, որ այդ ժամանակից ի վեր չինացի պաշտոնյաները, նաև մասնավոր կերպով, փորձել են հետ պահել Ռուսաստանի ղեկավարին նման ծրագրերից։ Չինաստանի կառավարության բարձրաստիճան խորհրդականի խոսքով՝ Մոսկվային միջուկային զենք կիրառելուց հետ պահելը կարևոր տեղ է զբաղեցնում Եվրոպայի հետ խզված կապերը վերականգնելու՝ Պեկինի արշավում:
«Չինացիներն այդ ուղերձը հասցնում են ռուսական իշխանություններին բոլոր մակարդակներում»,- ասել է ԱՄՆ նախագահ Ջո Բայդենի վարչակազմի բարձրաստիճան պաշտոնյաներից մեկը։
Չինաստանի աջակցությունը կարևոր դերակատարում ունի ՌԴ-ի համար, քանի որ Պեկինն օգնում է Մոսկվային շրջանցել տնտեսական պատժամիջոցները։
Կրեմլին մոտ կանգնած լրատվամիջոցի աղբյուրները պնդում են, որ ՌԴ նախագահը, վերլուծելով Ուկրաինայում մարտավարական միջուկային զենքի կիրառման հնարավոր հետևանքները, ինքն է որոշել, որ նման քայլը ձեռնտու չի լինի Ռուսաստանին։
«Միջուկային հարվածը տարածքներին, որոնք Պուտինը հայտարարել է ռուսական, դրանք կվերածեն ռադիացիայով վարակված անապատի և քիչ բանով կօգնեն ռուսական զորքերի առաջխաղացմանը»,- ասել են զրուցակիցները։
Այնուամենայնիվ, լրատվամիջոցի հետ զրույցում փորձագետները նշել են, որ դա բացառել չի կարելի։
«Միջուկային զենքը Պուտինի վերջին երաշխիքն է այս պատերազմում աղետալի պարտությունից»,- ասել է Carnegie Russia Eurasia Center վերլուծական կենտրոնի ղեկավար Ալեքսանդր Գաբուևը։
Էմմա Չոբանյան
