15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
ԼՂ-ի դեմ Ադրբեջանի նոր պատերազմի լրջագույն վտանգ կա․ ՌԴ-ն չի՛ միջամտելու, ԱՄՆ-ը վճռորոշ դեր պիտի ունենա՝ կանխելու․ Տիգրան Գրիգորյան. ՏԵՍԱՆՅՈՒԹ
Քաղաքականություն
04.07.2023 | 20:02
Factor TV–ի հարցազրույցը Ժողովրդավարության և անվտանգության տարածաշրջանային կենտրոնի ղեկավար, քաղաքագետ Տիգրան Գրիգորյանի հետ
–Ըստ Արցախի հակաճգնաժամային խորհրդի նախագահ Տիգրան Պետրոսյանի՝ Արցախի նախագահ Արայիկ Հարությունյանը դիմել է ՌԴ նախագահ Վլադիմիր Պուտինին, ներկայացրել է երկրի և ժողովրդի ծանր վիճակը։ Պետրոսյանը կարծում է, որ եթե հստակ քայլեր չտեսնենք Ռուսաստանից, ապա լռելը հավասարազոր կլինի կործանման։ Ունե՞ք տեղեկություն այս նամակի վերաբերյալ և ի՞նչ պատասխան եք ակնկալում։
-Ես էլ եմ տարբեր աղբյուրներից լսել դրա մասին։ Եթե Տիգրան Պետրոսյանն էլ է այդ մասին խոսել, ուրեմն տեղի է ունեցել, քանի որ գիտենք՝ նա աշխատում է նախագահականին կից կառույցում և առանց լուրջ հիմքերի նման ինֆորմացիա չէր հրապարակի։ Կարծում եմ՝տեղեկությունը համապատասխանում է իրականությանը։ Սա առաջին դեպքը, չէ, երբ Արցախի նախագահը նման իրավիճակներում փորձում է ինչ-որ մեսիջներ հասցնել ՌԴ-ին։ Ռուսները, ամենայն հավականությամբ, հասկանում են՝ ինչ իրավիճակ է Արցախում, այնտեղ ներկայություն ունեն, և դժվար թե Արցախի նախագահի միջոցով տեղեկանան Արցախում ստեղծված իրավիճակի մասին, սակայն խնդիրն այն է, որ Ռուսաստանի առաջնահերթություններն այս պահին Ուկրաինայի հետ են կապված, և տեսնում ենք, որ իրենց կենսական շահերին վերաբերող մի շարք դեպքերում անգամ ի վիճակի չեն ավելի կտրուկ քայլեր ձեռնարկել։ Այս պարագայում չեմ կարծում, թե ինչ-որ լուրջ ակնկալիքներ պետք է ունենալ այսպիսի նամակներից կամ ռուսական կողմից։
-Արցախցիների մեծամասնությունը հավատացել է ոչ թե Արցախի ղեկավարին, այլ Պուտինի խոսքերին, և մարդիկ վերադարձել են Ստեփանակերտ։ Արցախցիներին, Ձեր կարծիքով, պետք է հետաքրքրի՞, թե Ռուսաստանն ինչ խնդիրներ ունի։
-Արցախցիներին հետաքրքում են անվտանգության երաշխիքները, և երբ հիշատակվում են ՌԴ նախագահի խոստումները, այդ համատեքստում է այդ ամենը նկատի առնվում։ Արցախցիներին, միգուցե, չի հետաքրքրում, բայց տեսնում ենք, որ Ռուսաստանը թե՛ խնդիրների պատճառով, թե՛ իր շահերից ելնելով՝ կոնկրետ քայլեր չի ձեռնարկում, և վերջին շրջանում միտումն այն է, որ ԼՂ-ի և ՀՀ-ի շահերի հաշվին փորձում է նոր ստատուս-քվոյին հարմարվել, որը ստեղծվում է Ադրբեջանի կողմից։ Այսինքն՝ ՌԴ-ն ի վիճակի չի լինելու Ադրբեջանին ստիպել հրաժարվել սադրիչ գործողություններից, նոյեմբերի 9-ի փաստաթղթի խախտումներից։ Նրանք փորձում են համոզել արցախցիներին, որ, միգուցե, պետք է հարմարվել այս իրավիճակին, միգուցե, հնարավոր են այլ լուծումներ Ադրբեջանի հետ ինտեգրացիայի տրամաբանության ներքո։
Հարցազրույցն ամբողջությամբ՝ տեսանյութում։
Ռոբերտ Անանյան
