26.06.2026 | 18:00
ԴՕԿ-ը Դանիել Իոաննիսյանին վկայի կարգավիճակով ՍԴ հրավիրելու միջնորդություն ներկայացրեց․ ՏԵՍԱՆՅՈՒԹ
Պրիգոժինի ապստամբությունը Ռոստովին գրեթե 100 մլն ռուբլու վնաս է պատճառել
Քաղաքականություն
04.07.2023 | 14:41
«Վագներ» մասնավոր ռազմական խմբավորման ծանր տեխնիկան, որը հունիսի 24-ին ապստամբության փորձի ժամանակ մտցվել էր Դոնի Ռոստով, մեծ վնաս է հասցրել քաղաքի ճանապարհներին ու մայթերին։ Քաղաքային իշխանությունները վնասը գնահատում են 92,5 մլն ռուբլի, գրում է DW-ի ռուսական ծառայությունը։
«Նախնական հաշվարկներով՝ ճանապարհատրանսպորտային ոլորտում վնասի չափը կազմել է 28,8 միլիոն ռուբլի: Վնասվել է նաև հինգ միավոր մասնագիտացված կոմունալ տեխնիկա, այն վերականգնելու համար անհրաժեշտ է 63,7 միլիոն ռուբլի»,- ասվում է վարչակազմի հաղորդագրության մեջ։
Ռոստովի ղեկավար Ալեքսեյ Լոնգվինենկոն հստակեցրել է, որ քաղաքում վնասվել է 12 հազար քառակուսի մետր ճանապարհ և 210 քառակուսի մետր մայթ։
Ռոստովը հունիսի 24-ի գիշերն անարյուն գրավվել էր «Վագների» կողմից, իսկ երեկոյան վարձկանների ստորաբաժանումները լքել էին քաղաքը։
Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել և Դոնի Ռոստովից այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվելու էին Բելառուս, իսկ Պրիգոժինի նկատմամբ հարուցված քրեական գործը կարճվելու էր։
Էմմա Չոբանյան
