Քաղաքականություն
04.07.2023 | 13:48
Շանհայի համագործակցության կազմակերպության (ՇՀԿ) առաջնորդներն այսօր առցանց գագաթնաժողով կանցկացնեն, որը կհյուրընկալի Հնդկաստանը՝ ընդլայնելու եվրասիական խմբի ազդեցությունը՝ օգտագործելով Իրանի ընդգրկումը և բացելով Բելառուսի անդամակցության ճանապարհը: Այս մասին հայտնում է Reuters-ը։
Չինաստանի նախագահ Սի Ցզինպինը և Ռուսաստանի նախագահ Վլադիմիր Պուտինը կմասնակցեն վիրտուալ գագաթնաժողովին, որը կլինի Պուտինի առաջին ելույթը միջազգային միջոցառմանը «Վագներ» մասնավոր ռազմական խմբավորման ապստամբությունից հետո:
Կազմակերպության անդամները ծրագրում են Իրանին ընդունել որպես կազմակերպության անդամ։ Մինչդեռ Բելառուսը պարտավորությունների հուշագիր կստորագրի, որը հետագայում կհանգեցնի Մինսկի անդամակցությանը։
Գագաթնաժողովը տեղի է ունենում Հնդկաստանի վարչապետ Նարենդրա Մոդիի՝ ԱՄՆ պետական այցից երկու շաբաթ անց, որից հետո երկու երկրների ղեկավարները պետությունների հարաբերությունները գնահատել էին որպես «ամենամոտ գործընկերներ»։
Հավելենք, որ Հնդկաստանն այս տարի նախագահում է ՇՀԿ-ում, ինչպես նաև G20-ում:
Տաթև Ֆռանգյան
