«Մեզ պետք է ձեր աջակցությունը»․ Եվգենի Պրիգոժինը նոր ուղերձով է հանդես եկել

«Վագներ» մասնավոր ռազմական խմբավորման հիմնադիր Եվգենի Պրիգոժինը ապստամբության փորձից հետո առաջին անգամ աուդիոհաղորդագրությունն է հրապարակել։ Այն տարածվել է խմբավորման  հետ սերտ կապեր ունեցող Grey Zone տելեգրամ ալիքում, գրում է Meduza-ն։

«Այսօր ավելի քան երբևէ մենք ձեր աջակցության կարիքն ունենք։ Շնորհակալ եմ դրա համար։ Ուզում եմ հասկանաք, որ մեր «արդարության երթը» ուղղված էր դավաճանների դեմ պայքարելուն ու մեր հասարակությունը մոբիլիզացնելուն։ Եվ ես կարծում եմ, որ այդ ամենի մեծ մասին մեզ հաջողվեց հասնել»,-ասել է նա։ Պրիգոժինը նաև վստահություն է հայտնել, որ մոտ ապագայում բոլորը կտեսնեն «հաջորդ հաղթանակները ճակատում»։ Իր հետագա պլանների ու գտնվելու վայրի մասին Պրիգոժինը ոչինչ չի հայտնել։

Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել՝ հունիսի 24-ին մտնելով Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվում են Բելառուս, իսկ Պրիգոժինի նկատմամբ հարուցված քրեական գործը կարճվում է։   Որոշ լրատվամիջոցներ, վկայակոչելով արևմտյան հետախուզության տվյալները, պնդում էին, որ Պրիգոժինը մտադրված  է եղել Շոյգուին ու Գերասիմովին գերի վերցնել։

Էմմա Չոբանյան