Շոյգուն առաջին անգամ մեկնաբանել է Պրիգոժինի ապստամբությունը

ՌԴ պաշտպանության նախարար Սերգեյ Շոյգուն առաջին անգամ հրապարակային մեկնաբանել է «Վագներ» խմբավորման հիմնադիր Եվգենի Պրիգոժինի կազմակերպած  ապստամբությունը, գրում է Ռիա Նովոստին։

«Չեմ կարող չանդրադառնալ ևս մեկ հարցի, որին մեր գերագույն գլխավոր հրամանատարն արդեն տվել է սպառիչ պատասխաններ։ Խոսքը հունիսի 23-25-ը  Ռուսաստանում իրավիճակի ապակայունացման փորձի մասին է։ Այդ պլանները ձախողվեցին առաջին հերթին այն պատճառով, որ ԶՈՒ-ի անձնակազմերը  հավատարմություն դրսևորեցին երդմանն ու զինվորական պատվին»,-ասել է Շոյգուն Ռուսաստանի զինված ուժերի ղեկավար կազմի հետ խորհրդակցության ժամանակ։

Նա նշել է, որ «սադրանքը չի ազդել ռուսական զորքերի խմբավորումների գործողությունների վրա, զինծառայողները խիզախորեն ու անձնուրաց շարունակել են լուծել իրենց առջև դրված խնդիրները»։

Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել՝ հունիսի 24-ին մտնելով Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվում են Բելառուս, իսկ Պրիգոժինի նկատմամբ հարուցված քրեական գործը կարճվում է։   Որոշ լրատվամիջոցներ, վկայակոչելով արևմտյան հետախուզության տվյալները, պնդում էին, որ Պրիգոժինը մտադրված  է եղել Շոյգուին ու Գերասիմովին գերի վերցնել։