«Վագները» հայտարարել է վարձկանների հավաքագրումը դադարեցնելու մասին

«Վագներ» մասնավոր ռազմական խմբավորման տելեգրամյան ալիքներում հաղորդագրություն է հայտնվել, որում ասվում է, որ մեկ ամսով դադարեցվում է վարձկանների հավաքագրումը, գրում է Meduza-ն։

Նման գրառում է հայտնվել «ЧВК Вагнер|Объявления о работе» ալիքում, որը վերահրապարակել է «ЧВК Вагнер|Сводки» ալիքը։

Գրառման մեջ ասվում է, որ ուկրաինական պատերազմին «Վագների» ժամանակավոր չմասնակցելու և Բելառուս տեղափոխվելու պատճառով ընկերությունը մեկ ամսով դադարեցնում է վարձկանների հավաքագրման տարածաշրջանային կենտրոնների աշխատանքը։

Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել, հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվում են Բելառուս։ Պրիգոժինի՝ Բելառուսի տարածքում լինելու փաստը հաստատել է նախագահ Ալեքսանդր Լուկաշենկոն։

Ավելի վաղ լրատվամիջոցները հայտնել էին, որ «Վագները» շարունակում է վարձկանների հավաքագրումը ուկրաինական պատերազմին մասնակցելու համար։

Էմմա Չոբանյան