25.02.2026 | 23:29
Ինչպես են ադրբեջանցի գործարարները ՌԴ-ին օգնում շրջանցել պատժամիջոցները. FT-ի հետաքննությունը
Ճապոնիայում հորդառատ անձրևների պատճառով 2 միլիոն մարդ կարող է տարհանվել
Քաղաքականություն
03.07.2023 | 15:46
Ճապոնիայում չդադարող անձրևների ֆոնին երկրի հարավում գտնվող Կյուսյու շրջանի իշխանությունները նախազգուշացրել են բազմաթիվ շրջաններից բնակիչների տարհանման մասին: Այս մասին հայտնում է ճապոնական NHK-ը։
Կումամոտո, Ֆուկուոկա, Օիտա, Միյաձակի, Սագա և Յամագուչի պրեֆեկտուրաներում սողանքների վտանգը չափազանց բարձր է, ասվում է հաղորդագրության մեջ։
Ավելի վաղ ֆրանսիական AFP-ն հայտնել էր, որ հնարավոր տարհանման մասին նախազգուշացումն առնչվելու է Ճապոնիայի արևմուտքում բնակվող շուրջ երկու միլիոն մարդու։ Մասնավորապես, համապատասխան հրաման է ստացել հարավ-արևմտյան Ֆուկուոկա պրեֆեկտուրայի Կուրումե քաղաքում մոտ 115 հազար մարդ, Կումամոտո պրեֆեկտուրայի համանուն քաղաքում՝ 360 հազար մարդ։
Եղանակային պայմանների պատճառով մի շարք հատվածներում վնասվել են ենթակառուցվածքները։ Այսպիսով, Ճապոնիայի արևմտյան Յամագուչի պրեֆեկտուրայում հորդառատ անձրևի պատճառով խաթարվել է երկաթուղային հաղորդակցությունը, իսկ Մայն քաղաքում փլուզվել է գետի վրայով անցնող երկաթուղային կամուրջը։
Ճապոնիայի հարավ-արևմուտքն ամեն ամառ բախվում է հորդառատ անձրևների խնդրին, որոնք հանգեցնում են գետերի վարարումների, հսկայական տարածքների հեղեղումների, սողանքների և մարդկային կորուստների։ Տոկիոյի Ազգային օդերևութաբանական ծառայությունը զգուշացնում է, որ հորդառատ անձրևները կշարունակվեն մինչև հուլիսի 4-ը։
Տաթև Ֆռանգյան
