Պուտինը կարող է հարվածել Զապորոժեի ատոմակայանին. Times

Ռուսաստանի նախագահ Վլադիմիր Պուտինը կարող է հրամայել պայթեցնել Զապորոժիեի ատոմակայանը՝ իր երերուն դիրքերն ամրապնդելու համար։ Այս մասին ասվում է բրիտանական The Times պարբերականի խմբագրականում։

Նշվում է, որ Պուտինի համար, որպես ավտորիտար կառավարչի, կարևոր է պահպանել դեմքն իր կողմնակիցների աչքում։ Սակայն պատերազմի ընթացքը, որի սանձազերծումն ինքնին «ռազմավարական հսկայական սխալ» էր, ինչպես նաև վերջին ապստամբության փորձը, ըստ բրիտանական պարբերականի, կարող են Պուտինին մղել որոշակի արմատական քայլերի։

Պուտինի բանակը վաղուց չի կարողանում հանրությանը ցույց տալ իրական հաջողություններ ճակատներում, ինչը խոցում է հաջողակ և վճռական առաջնորդի իմիջը, իսկ հունիսի 24-ի իրադարձությունները, ըստ Times-ի, է՛լ ավելի են ի ցույց դրել Պուտինի դիրքորոշման անորոշությունը. ռուսական բանակը գրեթե դիմադրություն չցուցաբերեց Պրիգոժինի «վագներականներին», իսկ Ռոստովում, ըստ Times-ի, «խանդավառությամբ են դիմավորել վարձկաններին»։

«Սա վտանգավոր պահ է Պուտինի ռեժիմի համար և, հետևաբար, մեծ վտանգի պահ է տարածաշրջանի համար։ Քաղաքական ճակատագրի բարեհաճությունը վերականգնելու համար Պուտինը կարող է գայթակղվել՝ սաստկացնել պատերազմը արագ հաղթանակների հույսով»,- գրում է Times-ը:

«Նրա բանակն արդեն պայթեցրել է Կախովկայի հիդրոէլեկտրակայանի ամբարտակը (չնայած Ռուսաստանը դա կտրականապես հերքում է): Միանգամայն հնարավոր է, որ նրանք ունեն նաև Զապորոժիեի ատոմակայանին հարվածելու ծրագիր»,- շարունակում է պարբերականը։

Ուկրաինայի իշխանությունները վաղուց են խոսում իրենց կողմից օկուպացված Զապորոժիե ԱԷԿ-ում ռուսական դիվերսիայի սպառնալիքի մասին։ Ռուսաստանը հերքում է այդ կասկածները։

The Times-ը նշում է, որ նման կասկածների օգտին է խոսում կայանից զինվորականների և անձնակազմի աստիճանական դուրսբերումը, որի մասին հաղորդումներ են հայտնվել վերջին օրերին։ Ըստ Times-ի՝ ՆԱՏՕ-ի երկրները պետք է խստորեն զգուշացնեն Մոսկվային, որ անպատասխան չեն թողնի ատոմակայանների ուղղությամբ դիվերսիաները՝ պոտենցիալ աղետալի հետևանքներով։