Իրաքը Շվեդիայից պահանջում է արտահանձնել Ղուրանն այրած իրաքցի փախստականին

Իրաքի դատական իշխանությունները հայտարարել են, որ ընթացակարգ են սկսելու՝ իրաքցի փախստականին արտահանձնելու պահանջով, որը Ստոկհոլմի մզկիթի դիմաց այրել էր Ղուրանի պատճենը։ Մինչ այդ էլ, Բաղդադում Շվեդիայի դեսպանատան մոտ բողոքի ակցիաներ են նախատեսվում, գրում է Rudaw-ն։

Իրաքի Բարձրագույն դատական խորհրդի նախագահ Ֆաիք Զիդանը հանձնարարել է դատախազներին նախապատրաստել «իրավական ընթացակարգերը՝ պահանջելու անձին արտահանձնել» և հետաքննություն սկսել օրենքի համաձայն։

Իրաքի կառավարության խոսնակ Բասեմ ալ-Ավադին խստորեն դատապարտել է Ղուրանի այրումը։ Ավելի վաղ էլ Իրաքի ԱԳ նախարարությունը դատապարտել էր Շվեդիային այն բանի համար, որ իրաքցի փախստականին թույլ է տվել այրել Ղուրանի օրինակը, ինչը «լուրջ վիրավորանք է կրոնական սրբություններին»:

Հիշեցնենք, որ հունիսի 28-ին 37-ամյա Սալվան Մոմիկան, որը մի քանի տարի առաջ Իրաքից փախել էր Շվեդիա, ոստիկանությունից թույլտվություն էր խնդրել բողոքի ակցիա անցկացնելու  և այրելու մահմեդականների Սուրբ գիրքը՝ «Ղուրանի մասին իր կարծիքն արտահայտելու համար»։ Մոմիկան ոտքով հարվածել էր Ղուրանին, գրքի մեջ խոզապուխտ լցրել և այրել էջերը։

Հավելենք, որ այս արարքը խոստորեն դատապարտել են նաև Թուրքիայի իշխանությունները։ Մասնավորապես, Թուրքիայի նախագահ Ռեջեփ Թայիփ Էրդողանը հայտարարել է, որ Անկարայի արձագանքը Ստոկհոլմում տեղի ունեցածին չափազանց կոշտ է լինելու, և այդ ընթացքը կշարունակվի այնքան ժամանակ, մինչև Արևմուտքը չսովորի վճռականություն դրսևորել «իսլամատյացության և ահաբեկչության դեմ պայքարում»։

Էմմա Չոբանյան