Ստոր արարք է․ Թուրքիայի ԱԳՆ-ն դատապարտել է Շվեդիայում Ղուրանի այրմամբ ուղեկցված բողոքի ակցիան

Թուրքիայի ԱԳՆ-ն դատապարտել է նախօրեին Շվեդիայում Ղուրանի այրմամբ ուղեկցված ակցիան՝ դա անվանելով «ստոր» և «արհամարհելի» արարք, գրում է Turkish Minute-ը։

Ստոկհոլմի գլխավոր մզկիթի մոտ մի տղամարդ բողոքի ցույց էր անցկացրել այն բանից հետո, երբ շվեդական ոստիկանությունը թույլատրել է բողոքի ակցիա անցկացնել, որը համընկել է մահմեդական Կուրբան Բայրամ տոնի մեկնարկի հետ։

Թուրքիայի ԱԳ նախարար Հաքան Ֆիդանն իր թվիթերյան էջում գրել է, որ «անիծում է այդ զազրելի արարքը, որը կատարվել է Սուրբ գրքի՝ Ղուրանի դեմ Կուրբան Բայրամի առաջին օրը»։

«Անընդունելի է նման հակաիսլամական գործողություններ թույլ տալ խոսքի ազատության պատրվակով։ Նման վայրագ արարքների վրա աչք փակելը նշանակում է մեղսակից լինել»,- գրել է Ֆիդանը։

37-ամյա Սալվան Մոմիկան, որը մի քանի տարի առաջ Իրաքից փախել է Շվեդիա, ոստիկանությունից թույլտվություն է խնդրել այրել մահմեդականների Սուրբ գիրքը՝ «Ղուրանի մասին իր կարծիքն արտահայտելու համար»։ Մոմիկան ոտքով հարվածել է Ղուրանին, գրքի մեջ խոզապուխտ դրել և այրել էջերը:

Հիշեցնենք, որ հունվարին Թուրքիայի դեսպանատան մոտ մահմեդականների Սուրբ գրքի այրումը հանգեցրել էր շաբաթներ տևած բողոքի ցույցերի, շվեդական ապրանքները բոյկոտելու կոչերի և հետագայում Շվեդիայի՝ ՆԱՏՕ-ին անդամակցության հայտը կասեցվեց Անկարայի կողմից։

Թուրքիան և Հունգարիան շարունակում են մնալ ՆԱՏՕ-ի միակ անդամները, որոնք դեռ չեն վավերացրել Շվեդիայի հայտը։

Էմմա Չոբանյան