ՆԱՏՕ-ն պատրաստ է պաշտպանվել Մոսկվայի կամ Մինսկի ցանկացած սպառնալիքից․ Ստոլտենբերգ

ՆԱՏՕ-ն պատրաստ է պաշտպանվել Մոսկվայի կամ Մինսկի ցանկացած սպառնալիքից։ Նման հայտարարությամբ է հանդես եկել դաշինքի գլխավոր քարտուղար Յենս Ստոլտենբերգը, գրում է DW-ի ռուսական ծառայությունը։

Նա նշել է, որ դեռ վաղ է որևէ եզրակացություն անել «Վագներ» մասնավոր ռազմական խմբավորման ղեկավար Եվգենի Պրիգոժինի՝ Բելառուս տեղափոխվելու հետևանքների մասին։ Ըստ Ստոլտենբերգի՝ նրա ուժերի մի մասը նույնպես կհիմնավորվի Բելառուսում։

«Մենք հստակ ազդանշան ենք ուղարկել Մոսկվային և Մինսկին, որ ՆԱՏՕ-ն գոյություն ունի՝ պաշտպանելու յուրաքանչյուր անդամի և ՆԱՏՕ-ի տարածքի յուրաքանչյուր թիզ»,- ասել է դաշինքի գլխավոր քարտուղարը։

Նա հավելել է, որ Ռուսաստանի և Բելառուսի մայրաքաղաքներում «ոչ մի տեղ չպետք է լինի թյուրիմացություն դաշինքի ունակությունների հետ կապված՝ պաշտպանելու դաշնակիցներին ցանկացած հնարավոր սպառնալիքից՝ անկախ «Վագների» ուժերի տեղաշարժերից»։

Ստոլտենբերգը, միաժամանակ, ասել է, որ Արևմուտքը չպետք է «թերագնահատի» Ռուսաստանին անցած հանգստյան օրերին տեղի ունեցած քաոսային իրադարձություններից հետո։ Նա նշել է, որ Լիտվայում հուլիսին կայանալիք գագաթնաժողովում դաշինքը կենտրոնանալու է հավաքական պաշտպանության ամրապնդման լուծումների վրա՝ պաշտպանելու իր բոլոր անդամներին, հատկապես՝ նրանց, որոնք ընդհանուր սահման ունեն Ռուսաստանի և Բելառուսի հետ։

Լիտվայի նախագահ Գիտանաս Նաուսեդան իր հերթին զգուշացրել է Բելառուսում «Վագներ»-ի զինյալների տեղակայման ռիսկերի մասին։

«Եթե «Վագներ»-ն իր սերիական մարդասպաններին Բելառուս տեղափոխի, ապա բոլոր հարևան երկրներն անկայունության ավելի մեծ վտանգի առաջ կկանգնեն»,- ասել է նա։

Հիշեցնենք, որ «Վագներ»-ի անդամները Եվգենի Պրիգոժինի գլխավորությամբ ապստամբություն էին սկսել և հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ավելի ուշ հայտնի դարձավ, որ Պրիգոժինը մեկնելու է Բելառուս, իսկ ռազմական հեղաշրջման փորձի հետ կապված քրեական գործը կկարճվի։

Նախօրեին Ալեքսանդր Լուկաշենկոն հաստատել է, որ Պրիգոժինն արդեն Բելառուսում է։

Էմմա Չոբանյան