07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Վատառողջ Էրդողանն այսօրվա միջոցառումներին նույնպես տեսակապով կմասնակցի
Քաղաքականություն
28.04.2023 | 13:17
Թուրքիայի նախագահ Ռեջեփ Թայիփ Էրդողանը, որն առողջական խնդիրներ ունի, այսօր նույնպես չի մասնակցելու նախատեսված միջոցառումներին ու նախընտրական հանդիպումներին։
Թուրքական լրատվամիջոցները հայտնում են, որ նախագահականի պաշտոնական կայքում հրապարակված ամենօրյա ժամանակացույցի համաձայն՝ Էրդողանն այսօր նախագահական նստավայրից տեսակապով մասնակցելու է Ադանայի՝ հուլիսի 15-ի նահատակների կամրջի բացման արարողությանը։ Իսկ ահա Ադանայում կայանալիք հանրահավաքը, որին պետք է մասնակցեր Էրդողանը, չեղարկվել է։
Հավելենք, որ առողջական խնդիրների պատճառով Էրդողանը վերջին օրերի քարոզարշավային միջոցառումներին չի մասնակցում։ Նախօրեին էլ նա ՌԴ նախագահ Վլադիմիր Պուտինի հետ դարձյալ տեսակապով էր մասնակցել թուրքական «Աքքույու» ատոմակայանի միջուկային վառելիքի բեռնման արարողությանը։
Թուրքիայի առողջապահության նախարար Ֆահրեթթին Քոջան նախօրեին հայտնել էր, որ Էրդողանի մոտ «գաստրոէնտերիտային վարակ» է, որի ազդեցությունը նվազել է, և Թուրքիայի նախագահի առողջական վիճակը լավ է։
Հիշեցնենք, որ Էրդողանի ինքնազգացողությունը վատացել էր Kanal 7-ի և Ulke TV-ի համատեղ ուղիղ եթերում հարցազրույցի ժամանակ, որի պատճառով հեռարձակումը դադարեցվել էր։ Եթեր վերադառնալուն պես Էրդողանն անդրադարձել էր իր առողջական խնդիրներին՝ նշելով, որ ինտենսիվ քարոզարշավի պատճառով ստամոքսի հետ կապված խնդիրներ ունի։ Նախորդ օրերի նախընտրական հանդիպումներն էլ Էրդողանը չեղարկել էր «բժիշկների խորհրդով՝ տանը հանգստանալու համար»։
Էմմա Չոբանյան
