ՀՀ-ն և Նիդերլանդները գործակցում են ցեղասպանությունների կանխարգելման օրակարգի առաջ մղման ուղղությամբ․ ՍԴ նախագահ. ՏԵՍԱՆՅՈՒԹ

Հայաստանում Նիդեռլանդների Թագավորության դեսպանատունը կազմակերպել է Նիդեռլանդների Թագավորի օրը։  Միջոցառմանը ներկա էր ՀՀ Սահմանադրական դատարանի նախագահ Արման Դիլանյանը, ով ՍԴ-ի և անձամբ իր կողմից շնորհավորեց բարեկամ նիդեռլանդացի ժողովրդին՝ ազգային տոնի առթիվ։

ՍԴ նախագահն անդրադարձավ հայ-նիդեռլանդական հարաբերություններին ու երկու ժողովուրդների համագործակցությանը՝ կարևորելով իրավական պետության բարձր արժեքները։

«Ուրախալի է, որ հայ-նիդեռլանդական ավելի քան 30-ամյա դիվանագիտական հարաբերություններն էլ ավելի ամրապնդվեցին մեր պետությունում Նիդեռլանդների դեսպանության բացմամբ, ինչը հնարավորություն է ստեղծում առավել արդյունավետ փոխգործակցել և ապահովել ոչ միայն դատաիրավական ոլորտում, այլ նաև կրթության, բարձր տեխնոլոգիաների, զբոսաշրջության, գյուղատնտեսության, բանկային և մյուս բնագավառներում»,- նշեց ՀՀ ՍԴ նախագահը։

Արման Դիլանյանը նաև ընդգծեց, որ ՀՀ-ն և Նիդեռլանդները գործակցում են ցեղասպանությունների կանխարգելման օրակարգի առաջ մղման ուղղությամբ։

Նշենք, որ Koningsdag-ը՝ Թագավորի օրը կամ Թագավորի ծննդյան օրը՝ ազգային տոն է, որն ուղղակիորեն կապ ունի միապետի ծննդյան օրվա հետ, ու ազգային միասնության եւ համերաշխություն է խորհրդանշում։ Նիդեռլանդցիներն այդ օրը հագնում են նարնջագույն հագուստ, որը Օրանական Նասաու արքայատոհմի ընտանեկան գույնն է։ 2013 թվականից Նիդեռլանդների գահը Բեատրիքս թագուհուց փոխանցվել է որդուն՝ Վիլեմ Ալեքսանդրին, որը ծնվել է ապրիլի 27-ին, այդ տարի էլ տոնը վերանվանվել է Թագավորի օր կամ Թագավորի ծննդյան օր, իսկ տոնակատարության պաշտոնական ամսաթիվը հաստատվել է ապրիլի 27-ը։

Մանրամասները՝ տեսանյութում։