Նիկոլ Փաշինյանին վիրավորած պատմության ուսուցիչն արդարացվել է

Վարչապետ Նիկոլ Փաշինյանին վիրավորած Երևանի թիվ 129 հիմնական դպրոցի պատմության նախկին ուսուցիչ Հակոբ Գրիգորյանն արդարացվեց։ Վերաքննիչ քրեական դատարանը, քննելով պաշտպանական կողմի բերված վերաքննիչ բողոքը, որոշում կայացրեց բեկանել 150 հաղար դրամ տուգանքի մասով դատավճիռը և արդարացնել Գրիգորյանին։

Հիշեցնենք՝ Հակոբ Գրիգորյանին մեղադրանք էր առաջադրվել, որ նա, աշխատելով Երևան քաղաքի Հր. Քոչար 29 հասցեում գործող Գայի անվան թիվ 129 հիմնական դպրոցում որպես պատմության ուսուցիչ, համաձայն չլինելով ՀՀ վարչապետ Նիկոլ Փաշինյանի վարած քաղաքականության հետ և քաղաքական այլ հայացքներ ունենալու հանգամանքով պայմանավորված, 2021 թվականի մայիսի 21-ին՝ ժամը 12:00-ի սահմաններում, 7-րդ դասարանի պատմության դասաժամին, օգտագործելով իր պաշտոնեական դիրքը, աշակերտների ներկայությամբ ՀՀ վարչապետ Նիկոլ Փաշինյանի և նրա ընտանիքի անդամների նկատմամբ արել է բռնություն գործադրելու հրապարակային կոչեր, այն է՝ հայտարարել է, որ «Նիկոլ Փաշինյանին պետք է սպանել, նրան և նրա ընտանիքին պետք է հրապարակում վառել»:

Վերջինիս մեղադրանք էր առաջադրվել 226.2 երկրորդ մասի 2-րդ կետի հատկանիշներով՝ բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը՝ պատժվում են ազատազրկմամբ 1-3 տարվա ժամկետով կամ մինչև 3 ամիս կալանքի, կամ էլ տուգանք՝ առավելագույնը 300 հազար դրամով։  Ամիսներ առաջ դատավոր Մնացական Մարտիրոսյանն այս մասով վերջնական դատական ակտ էր կայացրել, վճռելով տուգանք սահմանել 150 հազար դրամի չափով.

«Հաշվի առնելով դատավորի հետագիծն ու հանրային ընկալումը՝ մեղադրական դատավճիռը մեզ համար անակնկալ չէր։ Մենք, բնականաբար, համաձայն չենք դատավճռին, և վստահորդիս հետ կքննարկենք դատական ակտի բողոքարկման հարցը միայն դրա ամբողջական տեքստը ստանալուց հետո. մեզ շատ հետաքրքիր է, թե ինչ փաստարկներով է դատարանը հերքել մեր պնդումները»,- դատավճռին անդրադառնալով նշել էր Գրիգորյանի պաշտպան Ռուբեն Մելիքյանը։

Նշենք՝ պատմության ուսուցիչ Հակոբ Գրիգորյանն այս պահին չի աշխատում. իր վերաբերյալ քրեական գործի հարուցումից հետո դիմում է գրել ու դուրս եկել դպրոցից:

Ռոզա Վարդանյան