19.03.2026 | 14:12
Վլադիմիր Պուտինը պարգևատրել է Պարալիմպիկ խաղերի եռակի չեմպիոն Անաստասիա Բաղիյանին
Զորքը չի կրակել. Անդրանիկ Քոչարյանի մեղադրանքն ու Փաշինյանի հերքումը․ ՏԵՍԱՆՅՈՒԹ
Քաղաքականություն
26.04.2023 | 20:30
44-օրյա պատերազմին հաջորդած ժամանակահատվածում, երբ թշնամական կողմը կրակել է հայկական դիրքերի, բնակավայրերի ուղղությամբ և տարածքներ է նվաճել, պատշաճ դիմադրության չի արժանացել։ Երեկ նման ուշագրավ հայտարարություն է արել ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։
Այս հայտարարության հետ կապված հավելյալ պարզաբանում ստանալու՝ Factor TV-ի փորձերին Անդրանիկ Քոչարյանը նախ դժկամությամբ արձագանքեց, ապա նշեց՝ նկատի է ունեցել հոգեբանական գործոնները։
Հիշեցնենք, որ 2021 թվականի հոկտեմբերի 27-ին Նիկոլ Փաշինյանը խոստովանեց, որ 2020-ի դեկտեմբերի 18-ին եղել է զորքերը Սյունիքից հետ քաշելու հրաման, ինչը նախատեսված չի եղել նոյեմբերի 9-ի հայտարարությամբ: Այս հրամանի հետևանքով Հայաստանը տարածքային կորուստներ է ունեցել, իսկ, Փաշինյանի պնդմամբ, հայկական կողմը խուսափել է նոր պատերազմից։
Եթե Հայաստանի վարչապետն է նահանջի հրաման տվել, ինչո՞ւ է ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը սլաքներն ուղղում դեպի զինվորականները։ Գուցե քաղաքական հրահա՞նգ է եղել։
Նիկոլ Փաշինյանի՝ դեռևս երկու տարի առաջ արված հայտարարությունը, մինչդեռ, հակասության մեջ է մտնում Անդրանիկ Քոչարյանի ասածների հետ։ Վարչապետն անթաքույց հայտարարել էր՝ ինքն է հրահանգել ու չի հրաժարվում։
Պաշտպանական ոլորտում թերացումները 5-րդ շարասյան գործողություններով պայմանավորող Անդրանիկ Քոչարյանին իր իսկ հայտարարության շուրջ մեկնաբանություն ստանալու մեր փորձերը նյարդայնացրին։
Ընդդիմությունից արձագանքում են ՔՊ-ական Անդրանիկ Քոչարյանին՝ պնդելով, որ այս իշխանությունն է մեղավոր թե՛ սահմանին, թե՛ բանակում ստեղծված իրավիճակների համար։ «Հայաստան» խմբակցության պատգամավոր Գեղամ Մանուկյանն Անդրանիկ Քոչարյանի այն հիմնավորումը, թե նկատի է ունեցել զորքի բարոյահոգեբանական վիճակի փոփոխությունը, կեղծ է որակում։
Ազատ գյուղի զինվորական կացարանում հրդեհի զոհ դարձած 15 զինծառայողների իրավահաջորդների շահերի պաշտպան, փաստաբան Նորայր Նորիկյանն Անդրանիկ Քոչարյանից հստակ պատասխաններ է պահանջում։
Ինքը՝ Անդրանիկ Քոչարյանը, ղեկավարում է 44-օրյա պատերազմի հանգամանքներն ուսումնասիրող հանձնաժողովի աշխատանքները։ Հանձնաժողովում Քոչարյանը միայնակ է մնացել ՔՊ-ականների հետ։ Խորհրդարանական և արտախորհրդարանական ուժերի ներկայացուցիչները չեն մասնակցում նիստերին, իսկ թե Անդրանիկ Քոչարյանն ինչպե՞ս կվարվի իր, այսպես ասած, ինքնախոստովանությունների հետ, պարզ կլինի հանձնաժողովի եզրակացությունից հետո, եթե այն հրապարակվի։
Մանրամասները՝ տեսանյութում։
Նարեկ Կիրակոսյան
