19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
Կրեմլը՝ Պուտին-Փաշինյան հեռախոսազրույցի մասին
Քաղաքականություն
26.04.2023 | 15:07
Կրեմլի մամուլի ծառայությունը հայտնել է, որ ՌԴ նախագահ Վլադիմիր Պուտինը հեռախոսազրույց է ունեցել ՀՀ վարչապետ Նիկոլ Փաշինյանի հետ։ Ինչպես ՀՀ վարչապետի աշխատակազմի, այնպես էլ Կրեմլի տարածած հաղորդագրության մեջ չի նշվում, թե ո՞ր կողմի նախաձեռնությամբ է տեղի ունեցել հեռախոսազրույցը։
Կրեմլի տարածած հաղորդագրության մեջ, մասնավորապես, ասվում է․ «Քննարկվել է Լեռնային Ղարաբաղի շուրջ իրավիճակի զարգացումը՝ շեշտը դնելով տարածաշրջանում կայունության և անվտանգության ապահովման գործնական խնդիրների լուծման վրա։ Լաչինի միջանցքում իրավիճակի ներկայիս սրման համատեքստում վերահաստատվել է Ռուսաստանի, Հայաստանի և Ադրբեջանի ղեկավարների միջև հիմնարար պայմանավորվածությունների ամբողջ շրջանակի խստիվ պահպանման կարևորությունը։ Ռուսաստանի նախագահը համերաշխություն է հայտնել հայ ժողովրդին վերջին սգո օրվա՝ Հայոց ցեղասպանության զոհերի հիշատակի տարելիցի կապակցությամբ։ Պայմանավորվածություն է ձեռք բերվել շարունակել շփումները տարբեր մակարդակներով»։
Հիշեցնենք՝ ավելի վաղ ՀՀ վարչապետի աշխատակազմը ևս կարճ հաղորդագրություն էր տարածել Փաշինյան-Պուտին հեռախոսազրույցի մասին։ Դրանում ասվում էր, որ վարչապետ Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ, քննարկվել են Լաչինի միջանցքին և Լեռնային Ղարաբաղում ստեղծված հումանիտար իրավիճակին վերաբերող հարցեր:
Տաթև Ֆռանգյան
