Հասարակություն
25.04.2023 | 16:25Ադրբեջանը ճնշում է գործադրում հայկական կողմերի վրա՝ իրեն հասանելի տարբեր մեթոդներով։ «Ադրբեջանական անցակետ Լաչինի միջանցքում․ էթնիկ զտման քաղաքականության նոր քայլերը» թեմայով քննարկման ժամանակ այս մասին ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը։
Նրա խոսքով՝ դա ներառում է դիսկուրսային ճնշում, որ Ղարաբաղ այլևս գոյություն չունի, նման հիմնախնդիր գոյություն չունի, ղարաբաղցիներ գոյություն չունեն և այլն։ Երկրորդ միջոցը ռազմական գործողություններն են, որոնցից վերջինը տեղի ունեցավ մի քանի օր առաջ։
Անդրադառնալով Լաչինի միջանցքում ադրբեջանական հսկիչ անցակետի տեղադրմանը՝ Ալեքսանդր Իսկանդարյանը նշեց, որ այն իրականում անցյալ տարվա դեկտեմբերին է տեղադրվել։
«Դե ֆակտո դեկտեմբերին է տեղադրվել։ Մարդիկ, որոնք այնտեղ կանգնած էին, ինչ-որ էկզոտիկ անվանումներ էին կոչվում, ոչ թե Ադրբեջանի զինծառայողներ։ Բայց փաստացի դրանք մարդիկ էին, որոնք այնտեղ կանգնած էին, որ ում ցանկանային՝ թողնեին անցնել, ում չցանկանային՝ չթողնեին։ Այս իրավիճակը կար, հիմա ֆորմալացվեց, և այդ մարդիկ արդեն ուղղակիորեն սահմանապահներ են կոչվելու»,- նշեց քաղաքագետը։
Մանրամասները՝ տեսանյութում։
