Ռուսական կողմը փորձում է թույլ չտալ անցակետի տեղադրումը. Տիգրան Աբրահամյան․ ՏԵՍԱՆՅՈՒԹ

Արցախում տեղակայված ռուս խաղաղապահները փաստացի փորձում են կանխել Ադրբեջանի կողմից Հակարիի կամրջի վրա անցակետ տեղադրելու մասին նախաձեռնությունը վերջնական ավարտին հասցնելը: Այս մասին այսօր՝ ապրիլի 25-ին, ԱԺ-ում լրագրողների հետ զրույցում ասաց «Պատիվ ունեմ» խմբակցության քարտուղար Տիգրան Աբրահամյանը:

«Իրավիճակը զարգանում է Հայաստանն Արցախին կապող Հակարիի կամրջի վրա: Հակարի գետը և կամուրջը գտնվում են Հայաստանի Հանրապետության Կոռնիձոր գյուղի անմիջական մատույցներում: Հաշվի առնելով այն հանգամանքը, որ Ադրբեջանը, ըստ էության, միակողմանի «զոռբայությամբ» փակել է կամուրջը և փորձում է հսկիչ անցագրային կետ տեղակայել, տպավորությունս այն է, որ ՌԴ-ն տեղյակ չի եղել Ադրբեջանի նախաձեռնությունից: Արցախում տեղակայված ռուս խաղաղապահները փորձում են կանխել Ադրբեջանի կողմից իր նախաձեռնությունը վերջնական ավարտին հասցնելը: Դա ակնհայտ էր նաև ՌԴ ԱԳՆ-ի հայտարարությունից, որը արձանագրում էր, որ ՌԴ-ի հետ դա համաձայնեցված չի եղել, և միջանցքի տրամաբանության փոփոխությունը հակասում է եռակողմ փաստաթղթի դրույթներին»,- նշեց պատգամավորը:

Աբրահամյանի խոսքով՝ անկհայտ է, որ խախտվել է նաև Ռուսաստանի և Ադրբեջանի միջև պայմանավորվածությունը. «Դրանից ելնելով՝ ՌԴ-ն ամեն ձևով փորձում է տեղում կանխել այդ անցակետի ռեժիմի գործարկումը: Տեղում բանակցությունները գնում են փոքր մակարդակով, բայց հիմնականը տեղափոխված է քաղաքական մակարդակ: Թե ինչ արդյունք կլինի, այս պահին շատ դժվար է ասել»:

Ընդդիմադիր պատգամավորի դիտարկմամբ՝ Ադրբեջանի լկտիությունը գալիս է այն հանգամանքից, որ 2020 թվականի նոյեմբերի 9-ի փաստաթղթի ստորագրումից հետո այդ դրույթները Ադրբեջանի կողմից բազմիցս խախտվել են, եւ որևէ ձեւով պատշաճ արձագանք չեն ստացել։

Մանրամասները՝ տեսանյութում։