13.09.2026 | 11:25
Խոշտանգման ենթադրյալ դեպքի առնչությամբ ՆԳՆ-ում ծառայողական քննություն է նշանակվել
Թուրքիայի Մարդու իրավունքների ասոցիացիան կոչ է անում վերջ տալ Հայոց ցեղասպանության ժխտմանը
Քաղաքականություն
25.04.2023 | 13:54
Ստամբուլում նախօրեին նախատեսվում էր անցկացնել Հայոց ցեղասպանության զոհերի հիշատակին նվիրված միջոցառում, սակայն նահանգապետարանի կողմից արգելվելուց հետո այն տեղի է ունեցել Մարդու իրավունքների ասոցիացիայի ստամբուլյան մասնաճյուղի գրասենյակում, գրում է Gercek News-ը։
Մասնավորապես, Մարդու իրավունքների ասոցիացիայի ռասիզմի և խտրականության դեմ հանձնաժողովը մամուլի ասուլիս է հրավիրել՝ ի պատասխան միջոցառման անցկացման արգելքի։ Ներկայացվել է կառույցի Ստամբուլի մասնաճյուղի համանախագահ Էրեն Քեսքինի հայտարարությունը։
«1915-ին սկսված գործընթացում ցեղասպանության ենթարկվեցին նաև Անատոլիայի քրիստոնեական այլ համայնքներ՝ ասորիներն ու հույները։ Ժխտում՝ նշանակում է մեղադրել ցեղասպանության զոհերին, և նրանց երեխաներին ու թոռներին որպես թշնամի դասել: Ցեղասպանության ժխտումը նշանակում է հավերժացնել մարդկության դեմ հանցագործությունը։ Ցեղասպանության հետևանքով իրենց հայրենիքից բռնի տեղահանված և աշխարհով մեկ սփռված հայերի պահանջները, ցանկությունները, նրանց կրած կորուստները, որոնք հնարավոր չէ հաշվել կամ չափել, պետք է լուծվեն։ Ժխտումը խոչընդոտ է նման հատուցման և արդարության հասնելու գործընթացին։ Ուստի մենք տարիներ շարունակ կոչ ենք անում՝ ճանաչեք ցեղասպանությունը, ներողություն խնդրեք դրա համար և փոխհատուցեք»,- ասվում է հայտարարության մեջ։
Էմմա Չոբանյան
