04.04.2026 | 20:03
ՃՏՊ՝ հրդեհի բռնկմամբ
Թուրքիայում հայերին արգելել են Ցեղասպանության զոհերի հիշատակին նվիրված միջոցառում անցկացնել
Քաղաքականություն
24.04.2023 | 20:28
Ստամբուլի նահանգապետարանն արգելել է ապրիլի 24-ին Հայոց ցեղասպանության զոհերի հիշատակին նվիրված միջոցառում անցկացնել, որը նախատեսվում էր Քադըքյոյ թաղամասում։ Այս մասին Factor.am-ին հայտնեց Ստամբուլում լույս տեսնող «Ակօս» պարբերականի հայերեն բաժնի խմբագիր Բագրատ Էստուկյանը։
«Անպատեհ են համարել»,- ասաց Էստուկյանը՝ նշելով, որ չնայած որոշումը Ստամբուլի իշխանություններն են հրապարակել, բայց այն կայացրել է Թուրքիայի նախագահ Ռեջեփ Թայիփ Էրդողանը։
Հիշեցնենք, որ Ստամբուլի իշխանությունները նախորդ տարի նույնպես թույլ չէին տվել Հայոց ցեղասպանության զոհերի հիշատակին նվիրված միջոցառում կազմակերպել։ Ստամբուլի հայ համայնքը հիշատակի միջոցառումներ իրականացրել է 2010 թվականից՝ առանց ընդմիջումների․ բացառություն էին միայն 2020 և 2021 թվականները՝ կորոնավիրուսի համավարակի պատճառով։
Թուրքիայի իշխանությունների այս դիրքորոշման ֆոնին հիշեցնենք, որ Երևանն ու Անկարան հատուկ բանագնացների միջոցով քննարկում են երկու երկրների հարաբերությունների կարգավորումը։
Հիշեցնենք նաև, որ փետրվարի 6-ին տեղի ունեցած ավերիչ երկրաշարժից հետո Հայաստանը երկու անգամ մարդասիրական օգնություն է ուղարկել Թուրքիա, ինչպես նաև փրկարարների, բացի այդ, ՀՀ արտաքին գործերի նախարար Արարատ Միրզոյանի գլխավորած պատվիրակությունն այցելել է Անկարա և աղետի գոտի։
Հավելենք, որ թեև հայերին արգելվել է հիշատակի միջոցառում անցկացնել, Ստամբուլի Քուրթուլուշ թաղամասում Թուրքիայի «Կանաչների» և «Ձախ ապագա» կուսակցության նախաձեռնությամբ Հայոց Ցեղասպանության զոհերին նվիրված միջոցառում են անցկացրել։
Նարեկ Կիրակոսյան
