Ընդդիմության առաջին հաջողված քաղաքական ակցիան էր, որն ունեցավ հստակ հաղթանակ․ Ալեքսանյան․ ՏԵՍԱՆՅՈՒԹ

Սա ընդդիմության առաջին հաջողված քաղաքական ակցիան էր։ Այս մասին այսօր Ազգային ժողովում հայտարարեց ՔՊ-ական պատգամավոր Վահագն Ալեքսանյանը՝ անդրադառնալով այսօր ԱԺ-ում տեղի ունեցած միջադեպին։

«Քիչ առաջ ԱԺ ամբիոնից պատգամավոր Թագուհի Թովմասյանը հայտարարեց, որ քաղաքական ակցիա է անում, որ այս ամբիոնից այլևս սուտ չհնչի։
Տիկին Թովմասյանի այդ «ակցիայի» մեկնարկից և ավարտից հետո ընդդիմադիր ոչ մի պատգամավոր այստեղից ելույթ չի ունեցել, ոչ մի չարչրկված մեղադրանք չի հնչեցրել, ոչ մի կեղծ թեզ ու նարատիվ չի գցել օրակարգ, ուստի թույլ տվեք արձանագրել, որ սա ընդդիմության հաջողված առաջին քաղաքական ակցիան է, որն ուներ հստակ նպատակ և ունեցավ հաղթանակ»,- իր ելույթում հայտարարեց Ալեքսանյանը:

Պատգամավորի խոսքով՝ ընդդիմությունը աղմուկի մեջ փորձում է խուսափել ԼՂ հարցի մասին ըստ էության խոսելուց, որովհետև, ինչպես ասաց նա, իրենք 10 տարի եղել են իշխանության, բա ինչու Արցախի անկախությունը չեն ճանաչել, դիվանագիտական հարաբերություններ չեն ստեղծել Արցախի հետ. «Փորձում են այնպես անել, որ մենք չխոսենք Մադրիդյան սկզբունքներից, Քի Վեսթից, ընդհանուր պետությունից:

Բայց ես շատ ուրախ եմ, որ այս նստաշրջանում մենք չթելեցինք իրենց թելը: Ես համոզված եմ, որ ճշմարտությունը երբեք կեղծիքին պարտվել չի կարող, և հուսով եմ, որ այսօր ձևավորված բարի ավանդույթը կշարունակվի, և այս ամբիոնից այսուհետ ևս սուտ չի հնչի»:

Հիշեցնենք, որ այսօր՝ ապրիլի 20-ին, Ազգային ժողովում շարունակվում է քննարկվել Կառավարության 2021-2026թթ. ծրագրի 2022թ. կատարման ընթացքն ու արդյունքները:

Մանրամասները՝ տեսանյութում։