Ես էլ եմ նույն սխալը գործել, ընդդիմությունն էլ. Նիկոլ Փաշինյան․ ՏԵՍԱՆՅՈՒԹ

ՀՀ վարչապետ Նիկոլ Փաշինյան ԱԺ-ում լրագրողների հետ զրույցում հաստատեց, որ նախկին արտգործնախարար Վարդան Օսկանյանը 2020 թվականի 44-օրյա պատերազմից հետո հանդիպել է իրեն։

Նշենք, որ երեկ ՀՀ նախկին արտգործնախարար Վարդան Օսկանյանը նախօրեին հայտարարել էր, որ պատերազմից հետո հանդիպել և նոր ստեղծված իրավիճակում որոշ առաջարկներ արել է Նիկոլ Փաշինյանին։

Դիտարկմանը, որ նախկին արտգործնախախարը դեռևս 2018 թվականին իրեն փորձել է առաջարկներ ներկայացնել Արցախի խնդրի կարգավորման շուրջ, Փաշինյանն արձագանքեց. «Ասում են՝ 2018 թվականին մենք սա էինք ուզում առաջարկել, թող հիմա հրապարակեն, թե ինչ էին ուզում առաջարկել, ես էլ կարձագանքեմ: Իրենց առաջարկներն ամբողջությամբ արտահայտված են իրենց թողած բանակցային ժառանգության մեջ»:

Փաշինյանը ընդգծեց, որ իր ակնկալիքն է ֆունդամենտալ խնդիրներին անդրադառնալ: «Իսկ ֆունդամենտալ պրոբլեմն այն է, որ բանակցային իրականությունը մի բան է եղել, եկել տեսախցիկների առաջ ուրիշ բան ենք խոսել:

Հիմա ես ինչ եմ փորձում անել 2018 թվականից, փորձում եմ այնպես անել, որ բանակցային սենյակներում և հրապարակային՝ ժողովրդի հետ խոսակցությունը, լինի նույնը, և դա շատ ցավոտ և բարդ պրոցես է»,- նշեց վարչապետը՝ հավելելով՝ ես էլ եմ նույն սխալը գործել, ընդդիմությունն էլ, որ չենք առերեսվել իրականության հետ։

Մանրամասները՝ տեսանյութում։