Ալիևը չէ, որ պետք է թելադրի մենք ինչ անենք. ՔՊ-ականը՝ հակադարձում է Ադրբեջանի նախագահին․ ՏԵՍԱՆՅՈՒԹ

Տեղ գյուղից դեպի համապատասխան սահմանային գոտի, որտեղ այդ գոտի գնալու խնդիրներ կան, կա ոստիկանական անցակետ, և ոստիկանությունը մեր տարածքում, ըստ անհրաժեշտության, բազմաթիվ անցակետեր է դնում կամ պարեկային շրջիկ երթևեկություն է իրականացնում: Ադրբեջանն ի՛նչ գործ ունի ընդհանրապես խառնվի, թե մենք որտեղ ենք անցակետ դնում. նման բան չկա և չի կարող լինել. անդրադառնալով  Տեղ գյուղի ճանապարհին Ադրբեջանի անցակետեր տեղադրելու հավանականության մասին լրագրողի հարցին՝ ասաց ԱԺ ՔՊ խմբակցության պատգամավոր Արմեն Խաչատրյանը:

Ինչ վերաբերում է Հայաստանի տարածք ներթափանցած Ադրբեջանի քաղաքացիներին վերադարձնելու հարցին, նա ասաց. «Դեռևս նման հնարավորություն չեմ տեսնում: Եթե տեղի է ունեցել հանցագործություն՝ մարդասպանություն, սահմանի խախտում, դա պետք է ամբողջությամբ քննվի, պարզաբանվեն բոլոր հանգամանքները, նոր դրանից հետո քաղաքական պրոցեսներ լինեն: Մենք էլ այնտեղ գերիներ ունենք, և ինչ պրոցեսներ կընթանան՝ չեմ կարող ասել, բայց մի բան հստակ կասեմ, որ քննությունը դատախազությունում և քննչական մարմիններում չի ընդհատվելու, արարքը որակվելու է, և հանցագործը դատի է տրվելու: Դրանից հետո ինչ պետական պայմանավորվածություններ կլինեն՝ կախված է իրավիճակից»:

Անդրադառնալով Ալիևի հայտարարությանը, թե Նիկոլ Փաշինյանը պետք է հայտարարի, որ Ղարաբաղը Ադրբեջան է, վերջինս ասաց, որ ամեն անգամ դժկամությամբ է մեկնաբանում Ալիևի սանձարձակ պահվածքը և հայտարարությունները:

«Եվ դա հասկանալի է՝ հաղթանակի էյֆորիայի մեջ է, բայց Ալիևը չէ, որ պետք է թելադրի, թե ինչ անենք և ոնց անենք: Ալիևը պետք է հասկանա, որ ուժով և բռնությամբ որևէ հարց չի կարող լուծել: Պետք է հասկանա նաև, որ հատկապես իր բռնապետական ռեժիմի պայմաններում նման հայտարարությունները ի վնաս իրեն են լինելու, և այդ ատելության մթնոլորտը, որ գեներացրել է իր ժողովրդի մոտ, մի օր իր իշխանության դեմ է ուղղվելու. բոլոր բռնապետների վերջն այդպիսին է»:

Մանրամասները՝ տեսանյութում։