Հասարակություն
18.04.2023 | 20:53
Ազատ գյուղի զինվորական կացարանում զոհված 15 զինծառայողների ծնողները Սևան քաղաքի հատվածում փակել են Երևան-Սևան մայրուղին: Զինծառայողների ծնողների ներկայացուցիչ Նորայր Նորիկյանը Factor.am-ի հետ զրույցում ասաց, որ պահանջով դիմել են Գեղարքունիքի մարզպետ Կարեն Սարգսյանի, որպեսզի վերջինս վարչապետ Նիկոլ Փաշինյանի և Պաշտպանության նախարար Սուրեն Պապիկյանի հետ հանդիպի ծնողներին: «Եթե այսօր չկարողանան հանդիպել, ապա հանդիպման հստակ օր ու ժամ նշեն: Չենք հեռանալու մինչև մեր պահանջը չկատարվի»,- նշեց Նորիկյանը:
Հիշեցնենք` թեև հարազատները մի քանի անգամ պահանջել են Պապիկյանի հետ հանդիպում, անգամ ակցիաներ արել ՊՆ-ի, Կառավարության շենքերի դիմաց, բայց Փաշինյանն ու Պապիկյանը նրանց այդպես էլ չեն ընդունել: Վերջերս ծնողների հետ էր հանդիպել զինդատախազ Գրիգոր Էլիզբարյանը:
Նշենք, որ վաղը կլրանա ողբերգական հրդեհի 3 ամիսը, բայց մինչ այժմ որևէ մեկը պատասխանատվության չի ենթարկվել ու դեպքի շատ հանգամանքներ պարզված չեն:
Արփի Հակոբյան
