08.08.2026 | 16:10
Քրեական վարույթի շրջանակում անձի անձնական և ընտանեկան կյանքին առնչվող տվյալների անհարկի հրապարակումն անթույլատրելի է. ՄԻՊ
ՀՀ ԳԱԱ Ֆիզիկայի կիրառական պրոբլեմների ինստիտուտի տնօրեն է ընտրվել Վահան Քոչարյանը
Հասարակություն
18.04.2023 | 16:39
Սույն թվականի ապրիլի 18-ին ՀՀ Գիտությունների ազգային ակադեմիայի նախագահության նիստում ՀՀ ԳԱԱ Ֆիզիկայի կիրառական պրոբլեմների ինստիտուտի տնօրենի պաշտոնում ընտրվեց ինստիտուտի գործադիր տնօրենի ժամանակավոր պաշտոնակատար, ֆիզիկամաթեմատիկական գիտությունների թեկնածու Վահան Ռաշիդի Քոչարյանը․ տեղեկացնում են ՀՀ ԳԱԱ-ից։
Վահան Քոչարյանը ծնվել է 1976 թվականին՝ Երևանում։ 1993-1998 թվականներին սովորել է Երևանի պետական համալսարանի ռադիոֆիզիկայի ֆակուլտետում՝ «Գերբարձր հաճախականության ֆիզիկա» մասնագիտությամբ։ 2000 թվականից աշխատել է ՀՀ ԳԱԱ Ֆիզիկայի կիրառական պրոբլեմների ինստիտուտում, որտեղ էլ պաշտպանել է թեկնածուական ատենախոսություն՝ ստանալով ֆիզիկամաթեմատիկական գիտությունների թեկնածուի աստիճան։ 2007-2011 թվականներին եղել է ինստիտուտի «Ռենտգենյան ճառագայթների և տարրական մասնիկների փոխազդեցությունը նյութի հետ» լաբորատորիայի ավագ գիտաշխատող, իսկ 2011 թվականից լաբորատորիայի վարիչն է, 2022 թվականից՝ ինստիտուտի գործադիր տնօրենի ժամանակավոր պաշտոնակատարը։
Վահան Քոչարյանը 47 գիտական հոդվածի հեղինակ է, մասնակցել է բազմաթիվ գիտաժողովների, ղեկավարել ատենախոսական աշխատանքներ։
ՀՀ ԳԱԱ նախագահության նիստում Վահան Քոչարյանը ներկայացրեց ՀՀ ԳԱԱ Ֆիզիկայի կիրառական պրոբլեմների ինստիտուտի զարգացման ռազմավարությունը։ Նա նշեց, որ ինստիտուտի տեսլականն է լինել միջազգային բարձր վարկանիշ ունեցող գիտական հաստատություն, որը կնպաստի պետության և հասարակության կայուն զարգացմանը՝ իրականացնելով միջազգային գիտահեն ծրագրեր և մրցունակ գիտական հետազոտություններ:
