Էլի չկարացա չմեղադրեմ ոչ ոքի․ մեղավորը դուք եք․ Փաշինյանը՝ ընդդիմությանը․ ՏԵՍԱՆՅՈՒԹ

Վարչապետ Նիկոլ Փաշինյանը հրավիրվելու է 44-օրյա պատերազմի հանգամանքներն ուսումնասիրող քննիչ հանձնաժողով։ Այս մասին ԱԺ-ում հայտարարեց
Փաշինյանը հանձնաժողովի նախագահ Անդրանիկ Քոչարյանին հարց է ուղղել․ «Իսկ ընդդիմությունը կգա՞»:

«Ասել է՝ հնարավոր է՝ չգան, ասում եմ՝ մարդիկ կասեն գնացին, ընդդիմությունը չեկավ, իրենք-իրենցով նստեցին, խոսեցին, ջան ասեցին, ջան լսեցին, թողեցին, գնացին»,- ասաց վարչապետը՝ հավելելով, որ ՔՊ խմբակցության հետ քննարկել են՝ գուցե ձև գտնեն, որ գոնե իր հարցաքննությունը քննիչ հանձնաժողովում լինի հրապարակային:

«Այստեղ ԱԳՆ-ն իր պրոբլեմներն է բարձրացնում, ՆԳՆ-ն՝ իր, և այլն: Ես հիմա մտածում եմ՝ եկա, քննիչ հանձնաժողովում խոսեցի, այդ խոսացածը հույժ գաղտնի կնիքով կնքեցին, դրեցինք «սեյֆը», մարդիկ ասելու են՝ էլի տարան, ծածկադմփոց արին», – նշեց վարչապետը:

Փաշինյանը հիշեցրեց հայտնի խոսակցությունը, թե «Շուշին հայկական լինելու պարագայում հոկտեմբերի 19-ին վարչապետը հնարավորություն ուներ…, և այլն, և այլն»:

«Ես հիմա նայում եմ արձանագրությունները, թե ինչ դիրքորոշումներ եմ արտահայտել այն ժամանակ ու ես այն ժամանակ ճշգրիտ նկարագրել եմ Լաչինի միջանցքի՝ դեկտեմբերից ստեղծված վիճակը, կարող եմ ապացուցել, բայց դա չի եղել վերջնական պատճառը այդ օրը (նկատի ունի հոկտեմբերի 19-ը-հեղ.) որևէ թուղթ չստորագրելու: Ես քննիչ հանձնաժողովում կասեմ՝ նաև որն է եղել դրա պատճառը, հույս ունեմ՝ կգանք այն եզրակացության, որ ես դա պետք է հրապարակային ասեմ», – հայտարարեց վարչապետը:

Փաշինյանը շեշտեց, որ ոչ մեկ չի կարող իրեն ավելի շատ մեղադրել, որքան ինքն է իրեն մեղադրում:

«Մեզ մեղադրեք ճիշտ, ինչում որ մեղավոր ենք, որովհետև, եթե մեզ մեղադրում եք մի բանում, ինչում մեղավոր չենք, մենք ձեզ ենք մեղադրում, որովհետև իրական մեղավորը դուք եք, մենք չենք։ էլի չկարացա չմեղադրեմ ոչ ոքի», – ասաց վարչապետը՝ դիմելով ընդդիմությանը։

Մանրամասները՝ տեսանյութում։