Խաբել ենք ինքներս մեզ․ Փաշինյանը Արցախի ինքնորոշման և Ադրբեջանի տարածքային ամբողջականության մասին․ ՏԵՍԱՆՅՈՒԹ

Լեռնային Ղարաբաղի հակամարտության ողջ ընթացքում տարածքային ամբողջականության ու ինքնորոշման սկզբունքները դրվել են կողք-կողքի։ ԱԺ-ում «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին» զեկույցի ներկայացման ժամանակ հայտարարեց ՀՀ վարչապետ Նիկոլ Փաշինյանը։

«Սրանով, իրականում, արձանագրվել են իրողություններ, որոնք մենք չենք խոստովանել, բայց, անկախ մեր խոստովանությունից, դրանք գոյություն ունեն: Այս համատեքստում ինքնորոշման իրավունք նշանակում է, որ դու ինքնորոշման իրավունքի շահառուի պայմանականորեն «ա» կարգավիճակը վերանայելու հարց ես դնում, դա տեսականորեն կարող է նշանակել «ա» կարգավիճակը վերանայել, դարձնել «բ» կարգավիճակ, կամ վերանայել ու չփոխել, կամ վերանայել ու դարձնել «ա+1», «ա-1» կարգավիճակ»,- նշեց վարչապետը։

Փաշինյանի խոսքով՝ առանց ֆիքսելու «ա» կարգավիճակը՝ ապագա որևէ կարգավիճակի մասին՝ ինքնորոշման մասին, խոսք լինել չի կարող:

«Հիմա մենք սեփական ձեռքերով բանակցային, քաղաքական աշխարհաքաղաքական այս իրողությունը ստեղծել ենք, ցեմենտել ենք, բայց դրանից հետո ասել ենք՝ ԼՂ համար ցականում ենք «բ» կարգավիճակ՝ երբեք չընդունելով «ա» կարգավիճակը:

Սրանով խաբել ենք ինքներս մեզ, Հայաստանի ժողովրդին, Լեռնային Ղարաբաղի ժողովրդին», – ընդգծեց Փաշինյանը:

Վարչապետն ասաց, թե չափազանց կարևոր է, որ Բաքվի ու Ստեփանակերտի միջև երկխոսության միջազգային մեխանիզմ ձևավորվի ու այդ մեխանիզմը ապահովի ԼՂ հայության իրավունքների ու անվտանգության ապահովման օրակարգի իրացումը:

«Չափազանց կարևոր է, որ խաղաղության հնարավոր պայմանագրի իրագործման երաշխավորող միջազգային մեխանիզմներ ձևավորվեն, հակառակ դեպքում պայմանագրի ստորագրման հաջորդ օրը կարող է պատերազմ բռնկվել կամ նոր էսկալացիա տեղի ունենալ»,- նշեց Փաշինյանը՝ հավելելով, որ կարևոր է նաև կողմերի միջև ծագած վեճերի լուծման մեխանիզմների գոյությունը։

Մանրամասները՝ տեսանյութում։