Ամեն մի չմտածված, իբրև թե «հերոսական» քայլ կարող է նահանջ արձանագրել առաջընթացի ճանապարհին. Արայիկ Հարությունյանը` ծանրամարտի Եվրոպայի առաջնության մասին

Վարչապետի աշխատակազմի ղեկավար, ծանրամարտի Եվրոպայի առաջնության կազմկոմիտեի նախագահ Արայիկ Հարությունյանը ֆեյսբուքյան իր էջում անդրադարձել է երեկ առաջնության բացմանը տեղի ունեցած միջադեպին:

«Մեկ տարի շարունակ մի մեծ թիմ աշխատեց, որպեսզի ծանրամարտի Եվրոպայի առաջնությունը լիներ լավագույնը: Ամեն դետալ քննարկվել է ժամերով ու օրերով, հաշվի են առնվել քաղաքական, մարզական, բարոյահոգեբանական բոլոր նրբությունները: Արդյունքում ստացանք մի միջոցառում, որի համար մեր հայրենակիցները կարող են միայն հպարտություն ապրել:

Իհարկե, միջադեպը թույլ չտվեց լիարժեք վայելել Հայաստանը նորովի ներկայացնելու մեր ջանքը, որպես նորարարական, մշակութային, մարզական վերածնվող կենտրոն, որի հետ արժե խոսել, համագործակցել, ընկերություն անել: Ու ամեն դեպքում, գուցե ամենավերջին դետալը հաշվի չէինք առել, չէինք հաշվարկել, ու տեղի ունեցավ այս միջադեպը:

Այդուհանդերձ, այնքան աշխատանք է կատարված, որ վստահ եմ՝ ապրիլի 23-ին, երբ կավարտվի առաջնությունը, մեր գործընկերները կարձանագրեն, որ խնդիրը լուծված է շատ բարձր մակարդակով:

Պետությանը, այո՝ հենց պետությանը, պետք է վերաբերվել խնամքով: Ամեն մի չմտածված, իբրև թե «հերոսական» քայլ կարող է հետ գցել, նահանջ արձանագրել առաջընթացի ճանապարհին:
Շնորհակալություն հանդիսատեսին ակտիվության համար, հեռուստադիտողին՝ լավ արձագանքների: Այսօր տեսել եմ մեր մարզիկներին, լավ տրամադրությամբ գնում էին մարզման: Բացման այս արարողությունը, մրցաշարի բարձր մակարդակը նաև նրանց համար է, որպեսզի այլ երկրներում չխեղճանան, գլուխները բարձր ասեն՝ մենք մարզական լուրջ պետության ներկայացուցիչ ենք:

Ուստի առաջիկա օրերին լցնենք տրիբունաները ու աջակցենք մեր մարզիկներին: Մեզ հաղթանակեր են պետք»,- գրել է Արայիկ Հարությունյանը:

Հիշեցնենք, որ Հայաստանում անցկացվող ծանրամարտի Եվրոպայի առաջնության բացման ժամանակ դիզայներ Արամ Նիկոլյանը այրել էր Ադրբեջանի դրոշը, երբ ներկայացնում էին առաջնության մասնակից պետություններին։ Ակցիայից հետո անվտանգության աշխատակիցները Նիկոլյանին հեռացրին դահլիճից։ Նա բերման էր ենթարկվել Ոստիկանության Մալաթիայի բաժին, ավելի ուշ՝ ազատ արձակվել։

Ադրբեջանցի մարզիկները վերադառնում են Բաքու։

ՀՀ ԿԳՄՍ նախարարությունը հայտարարություն է տարածել Երևանում անցկացվող ծանրամարտի Եվրոպայի առաջնությանը Ադրբեջանի մարզիկների հետագա մասնակցությունը դադարեցնելու վերաբերյալ Ադրբեջանի Երիտասարդության և սպորտի նախարարության և Ազգային օլիմպիական կոմիտեի կայացրած որոշման առնչությամբ։