Փաշինյանը նկատի ունի զորքերի հայելային հետքաշումը. Անդրանիկ Քոչարյան․ ՏԵՍԱՆՅՈՒԹ

Ապրիլի 13-ին Նիկոլ Փաշինյանը Կառավարության հերթական նիստում հայտարարեց, որ պատրաստ են սահմանների դելիմիտացիային՝ Պրահայի և Սոչիի պայմանավորվածությունների հիման վրա․ Հայաստանը պատրաստ է հետ քաշել զորքերը Հայաստան-Ադրբեջան 1991 թվի սահմանի ողջ երկայնքով։ Այսօր ԱԺ-ում խորհրդարանական ճեպազրույցի ժամանակ լրագրողները «Քաղաքացիական պայմանագիր» խմբակցության պատգամավոր Անդրանիկ Քոչարյանից հետաքրքրվեցին, թե ինչ նկատի ուներ Նիկոլ Փաշինյանը, հատկապես, որ Փաշինյանի այդ հայտարարությանն արձագանքել էր նաև Ադրբեջանի ԱԳ նախարարության խոսնակը, ընդգծելով, որ Փաշինյանը պետք է պարզաբանի, թե ինչ նկատի ունի՝ ասելով 1991 թվականի սահմաններ։

Անդրանիկ Քոչարյանն ընդգծեց, որ ամեն ինչ շատ ակնհայտ է, պատասխանն Ադրբեջանն էլ ունի։ «Եվ այդ պատասխանը մեր պետական սահմանի արձանագրված հատվածն է, և այդտեղ որևէ խնդիր գոյություն չունի։ Ի՞նչ նկատի ունի պարոն Փաշինյանը, դա առաջին անգամ չէ հնչեցվում, որ զորքերի հայելային տեղաշարժ անենք, ինչն այդպես էլ մնացել է անպատասխան»,- նշեց պատգամավորը։

Անդրադառնալով հարցին՝ այդ հայտարարությունից հետո քարտեզներ հրապարակվեցին՝ 1991 թվականի, որտեղ Տիգրանաշեն գյուղը, Տավուշի մարզի, այսպես կոչված, «անկլավներն» էին վտանգի տակ դրվում, այս քարտեզները կա՞պ ունեն Նիկոլ Փաշինյանի հայտարարության հետ, Անդրանիկ Քոչարյանը պատասխանեց. «Մենք շարժվում ենք մեր ձեռքի տակ եղած, մեր պետական սահմանի հետ կապված քարտեզներով։ Եվ դա հաստատված է նաև, ռազմական մասը քարտեզների՝ Գլխավոր շտաբի մշտական օգտագործված քարտեզներով՝ Սովետական Միության»։

Մանրամասները՝ տեսանյութում։